Las autoritads svizras online

directamain tar il cuntegn

Assicuranzas socialas per persunas estras

Assicuranza obligatorica da malsauns

Il pli tard 3 mais suenter che Vus essas arrivads en Svizra u suenter che Vus avais cumenzà in'activitad da gudogn en Svizra, stuais Vus assicurar Vus sez e Vossa famiglia tar ina cassa da malsauns svizra. Cunfinaris cun domicil en tscherts stadis da la UE pon decider, sch'els vulan s'assicurar en Svizra u en il stadi da domicil.

Assicuranza cunter accidents a la plazza da lavur

Sche Vus lavurais 8 uras per emna u dapli, essas Vus assicurads cunter accidents sur Voss patrun.

Assicuranza per vegls, survivents ed invaliditad

  • Persunas che vivan u lavuran en Svizra èn assicuradas obligatoricamain tar l'assicuranza per vegls e survivents (AVS) sco er tar l'assicuranza d'invaliditad (AI).
  • Persunas emploiadas ston s'assicurar obligatoricamain tar ina instituziun da prevenziun (cassa da pensiun u instituziun da libra circulaziun) a partir d'ina tscherta entrada. Persunas cun activitad da gudogn independenta pon s'assicurar facultativamain tar ina cassa da pensiun.

Tge far en cas da dischoccupaziun?

Sche Vus tschertgais lavur u perdais Vossa plazza, stuais Vus As annunziar tar il center regiunal per intermediaziun da lavur (CIL). Sche Vus abitais a l'exteriur e lavurais en Svizra, retirais Vus l'indemnisaziun da dischoccupaziun en il pajais da domicil.

Sustegn per famiglias

  • Mintga dunna che abitescha e lavura en Svizra ha il dretg d'in congedi da maternitad e d'ina indemnisaziun en cas d'ina maternitad.
  • Il dretg da supplements da famiglia (supplements per uffants, supplements da scolaziun e tut tenor il chantun supplements d'adopziun e da naschientscha) han persunas emploiadas e dapi il 1. da schaner 2013 er persunas cun activitad da gudogn independenta. Er persunas senza activitad da gudogn han sut tschertas premissas il dretg da supplements da famiglia. Burgais da stadis da la UE/AECL survegnan ils supplements da famiglia entirs, sche lur uffants abitan en stadis da la UE/AECL.

Broschura davart las assicuranzas socialas