Las autoritads svizras online

directamain tar il cuntegn

Co poss jau adoptar l'uffant da la partenaria u dal partenari?

Premissas

Per che Vus possias adoptar l'uffant da la partenaria u dal partenari, stuais Vus ademplir las suandantas premissas fundamentalas:

  • Vus stuais manar ina chasada cuminaivla dapi almain 3 onns cun il bab resp. cun la mamma da l'uffant che Vus vulais adoptar.
  • Vus stuais esser almain 16 onns pli vegl che l'uffant e na dastgais betg esser dapli che 45 onns pli vegl che l’uffant. Excepziuns pon vegnir fatgas per motivs dal bain da l’uffant; quai stuais Vus dentant giustifitgar.
  • Vus stuais avair procurà durant almain 1 onn per la tgira e per l’educaziun da l’uffant.

Consentiment da l'auter genitur biologic sco er da l’uffant

Da princip è necessari il consentiment da l'auter genitur biologic da l’uffant.

I po dentant vegnir destistì dal consentiment, sche quest genitur è nunenconuschent, absent cun ina dimora nunenconuschenta dapi passa 2 onns u permanentamain inabel da giuditgar.
Sche l'uffant è abel da giuditgar (per regla a partir da 12 onns), sto el medemamain dar ses consentiment a l'adopziun.

Ulteriuras premissas

Betg mo tar in’adopziun communabla u tar in’adopziun singula, mabain er en cas d’ina adopziun da l’uffant da la partenaria u dal partenari sto l’autoritad cumpetenta sclerir, sche l’adopziun serva al bain da l’uffant.

Dumonda d'adopziun da l’uffant da la partenaria u dal partenari

L’autoritad centrala da Voss chantun da domicil ch’è cumpetenta per adopziuns As po dar infurmaziuns davart l’andament d’ina procedura d’adopziun.