Las autoritads svizras online

directamain tar il cuntegn

Jau hai gì in accident – tge èsi cun mia lavur?

Ils patruns èn obligads da far in'assicuranza cunter accidents da lavur per lur lavurants e – sche quels lavuran durant almain 8 uras per emna en la medema interpresa – er cunter accidents ordaifer la lavur.

Annunziar in accident a l'assicuranza

Suenter in accident – ch'i saja in accident da lavur u in accident ordaifer la lavur – stuais Vus annunziar immediatamain il cas a Voss patrun.

Il patrun da sia vart sto annunziar immediatamain l'accident a sia assicuranza. Vus sco persuna emploiada survegnis alura in formular che Vus resp. il medi responsabel sto emplenir cumplettamain e confurm a la vardad e trametter immediatamain a l'assicuranza cumpetenta.

Cuntinuaziun da la paja en cas d'accident

En Svizra èn tut ils lavurants assicurads obligatoricamain cunter las consequenzas d'in accident. A partir dal terz di suenter l'accident survegnis Vus ina diaria dad 80 pertschient da la paja. I na dependa betg sche l'accident è capità a la lavur u durant il temp liber.

In'excepziun vala per ils lavurants cun in pensum da lavur da main che 8 uras per emna. Per quels èn mo assicurads accidents da lavur u accidents che capitan sin il viadi a la lavur.

Sche l'assicuranza d'accidents è responsabla e sche las prestaziuns d'assicuranza cuvran almain 80 % da la paja, scroda l'obligaziun dal patrun da cuntinuar cun il pajament da la paja. Sche las prestaziuns d'assicuranza importan main che 80 % da la paja, sto il patrun pajar per in tschert temp la differenza fin 80 % da la paja. Sche l'assicuranza d'accidents n'è betg responsabla, sto il patrun pajar per in tschert temp l'entira paja.
La durada da la cuntinuaziun da la paja n'è betg fixada cleramain en las leschas. Pervia da quai vegnan applitgadas en la pratica scalas, cun las qualas po vegnir eruida la durada. Dar datti la scala da Basilea, da Turitg e da Berna.

Guardai en Voss reglament. Là è inditgà quai che vala en Voss manaschi.

Cuntinuaziun da la paja tenor la scala bernaisa, basilaisa e turitgaisa (en tudestg)

Desditga durant ina incapacitad da lavurar

Sche Vus essas incapabel da lavurar suenter in accident, na po Voss patrun betg desdir Vossa plazza durant in temp limità.

Lavurar malgrà in attest dal medi

Sche Vus essas scrit malsaun, na dastgais Vus betg lavurar. Cas cuntrari vegn l'assicuranza a pretender enavos la diaria ed eventualmain a far ina denunzia penala cunter Vus.