Las autoritads svizras online

directamain tar il cuntegn

Accident da traffic – tge èsi da far?

Tge che Vus stuais far, sche Vus essas pertutgà d'in accident da traffic cun in vehichel a motor u cun in velo.

Sche Vus avais in accident da traffic cun in vehichel a motor u cun in velo, As stuais Vus fermar immediatamain. Sche Vus bandunais il lieu da l'accident memia baud, vala quai sco uschenumnada fugia dal manischunz. Quai vegn persequità penalmain.

Tge èsi da far?

1. As procurai ina survista

  • Fermar il vehichel.
  • Betg perder la gnerva;mettai en funcziun la glisch d'avertiment sco er la glisch sbassada.
  • As procurai ina survista davart il dumber, il gener e la situaziun dals vehichels ch'èn cumpigliads da l'accident.
  • Hai persunas blessadas?
  • Exista in privel d'incendi u d'explosiun?
  • Hai vehichels cun rauba privlusa?

2. Segirai il lieu d'accident

  • Plazzai il triangul da panna en ina distanza d'almain 50 m avant il lieu d'accident – nua ch'i vegn charrà svelt, en ina distanza d'almain 100 m.

3. Prestai agid d'urgenza

  • Evacuai immediatamain persunas blessadas or da la zona da privel (pervia dal traffic che suonda; perquai ch'ils vehichels pudessan pigliar fieu).
  • Prestai emprim agid, As servi eventualmain da l'apoteca da l'auto.

4. Alarmai ils servetschs da salvament

  • Telefonai a la polizia (117), a la sanitad (144) u – en cas d'incendi – als pumpiers (118).Fin che la polizia arriva, dastgais Vus midar la situaziun al lieu d'accident mo per proteger persunas blessadas u per segirar il traffic. Sche pussaivel, fotografai ordavant la situaziun oriunda.

5. Tgirai persunas blessadas

  • Tgirai persunas blessadas, las observai precis e discurri cun ellas.

Accident da traffic sin l'autostrada

  • Guidai Voss vehichel sche pussaivel immediatamain sin il vial da panna.
  • Envidai la glisch d'avertiment.
  • Alarmai la polizia (tel. 117). Inditgai Voss lieu exact (numer da l'autostrada, direcziun da viadi, kilometer, ultima entrada u sortida).
  • Faschai attenziun dal traffic, cur che Vus bandunais Voss vehichel.
  • Giai en segirezza ordaifer il vial da l'autostrada.
  • As procurai ina survista da la situaziun d'accident.
  • Chaminai sin il vial da panna vers il traffic, faschond ir si e giu cun il maun il triangul da panna.
  • Segirai il lieu d'accident cun il triangul da panna.
  • Sin autostradas sto il triangul da panna vegnir postà en ina distanza d'almain 100 m avant il lieu d'accident.
  • Mettai en segirezza ordaifer la zona da privel quellas persunas blessadas che Vus pudais salvar.
  • N'As mettai er sez betg en privel.
  • Prestai agid d'urgenza e tgirai las persunas blessadas.
  • Na giai betg pli sin il vial.

Donns vi dal vehichel

Voss vehichel è vegnì donnegià? Resguardai per plaschair ils suandants puncts:

Documentar
Na muventai betg ils vehichels e fotografai ils vehichels donnegiads sche pussaivel da tut las varts.

Emplenir il protocol europeic d'accidents

  • Betg emblidar da suttascriver la vart davos.
  • Formulai il text en moda chapaivla.
  • Na prendi mai la culpa mo sin Vus.
  • Registrai il num e l'adressa da perditgas.

Telefonai a la polizia

  • Vus stuais adina avisar la polizia, sche persunas èn vegnidas blessadas uschia ch'ins sto far quint cun ina visita tar il medi.
  • Sche persunas involvidas As avessan da far difficultads, pudais Vus insister da clamar la polizia.
  • En cas da dubi vali adina la paina da clamar la polizia.

Assicuranza

  • Annunziai il donn immediatamain a Vossa assicuranza e laschai far las reparaturas pir cur che Voss vehichel è vegnì controllà.
  • Dumandai adina in preventiv dals custs en scrit avant che laschar far las reparaturas.