Tschertga

Al cuntegn
Siglia al cuntegn da la paginaSiglia a la navigaziunSiglia a la tscherna da la linguaSiglia a la tscherna da la linguaRespostas simplas davart la vita en Svizra
  • DE
  • FR
  • IT
  • RM
  • EN
Respostas simplas davart la vita en Svizra
  • Tut ils temas
  • Abitar
  • Locaziun
  • Contract da locaziun e contract da fittanza
Tut ils temas
  • Abitar
  • Locaziun
  • Contract da locaziun e contract da fittanza

Contract da locaziun e contract da fittanza

Il contract da locaziun u il contract da fittanza regla ils dretgs e las obligaziuns da locatarias e locataris sco er da locaturas e locaturs. La sutlocaziun è permessa en Svizra. Tar la disditga stuais Vus observar ils termins.

Tut ils temas
  • DE
  • FR
  • IT
  • RM
  • EN
In contract da locaziun vegn per il solit formulà en scrit. Intginas chaussas duessan vegnir menziunadas. Tut il rest po vegnir concludì libramain tranter las partidas.

Tge duess esser menziunà en il contract da locaziun?

  1. Ils nums da las partidas da locaziun:                                                                                       
    -En cas d'abitaziuns da famiglia èsi raschunaivel d'er menziunar la conjugala resp. il conjugal.           
    -En cas da cuminanzas d'abitar u en il concubinat stattan tut las persunas menziunadas solidaricamain bunas per il tschains da locaziun.

  2. L'uschenumnà «object da locaziun», il pli savens in'abitaziun inclusiv las localitads respectivas sco surchombras e tschaler, cundiever da la lavandaria e.u.v.

  3. La durada da la locaziun: I dat contracts limitads ed illimitads. La gronda part vegn fatga per ina durada illimitada: omaduas partidas han en quest cas il dretg – resguardond tschertas reglas – da desdir il contract.

  4. Termins da disditga.

  5. Tschains da locaziun mensil e custs accessoris: Sch'ils custs accessorics na vegnan betg inditgads en il contract da locaziun, pudais Vus partir dal fatg ch'els èn cumpigliads en il tschains da locaziun.

Tge po star en il contract da locaziun?

  1. In deposit dal tschains da locaziun, er numnà cauziun: Stuais Vus mo alura pajar, sche quai è pretendì en il contract. Per abitaziuns a tschains importa quel maximalmain trais tschains da locaziun mensils.

  2. Ulteriuras cunvegnas individualas sco per exempel ina regulaziun, sch'in animal da chasa dastga vegnir tegnì en las localitads affittadas.

  3. L'urden da chasa: El regla la convivenza da las partidas da locaziun (ruaus da notg, utilisaziun da la maschina da lavar e.u.v.).

  4. Las disposiziuns generalas dal contract

Model per in contract da locaziun

  • Contract da model da l'Associaziun da las locatarias e dals locataris

Dispita davart la relaziun da locaziun

Sche las partidas da locaziun han dispita pervia d'ina relaziun da locaziun, po l'autoritad da mediaziun locala ((Links)) gidar vinavant.
Vus dastgais sutaffittar Vossa entira abitaziun u ina singula chombra. Vus stuais dentant infurmar la locatura u il locatur en chaussa.
La sutlocaziun dastga mo vegnir scumandada en ils suandants cas:

  • Sche Vus refusais da communitgar ils detagls davart la sutlocaziun.

  • Sche Vus dais a tschains l'abitaziun memia char. Tar in'abitaziun mobigliada dastgais Vus metter a quint – pervia dal mobigliar che vegn svalità tras isada – in augment da maximalmain 20 pertschient. Uschiglio duessas Vus mo metter a quint l'import che Vus pajais sezza u sez (incl. custs accessorics).

  • Sch'i resulta per la locatura in dischavantatg essenzial tras la sutlocaziun. Per exempel sch'ina stanza en ina chasa ruassaivla vegn duvrada sco local d'exercitar d'ina band.

Model per in contract da sutlocaziun

Giuridicamain n'è in contract en scrit betg stringentamain necessari, vegn dentant recumandà: Document da model per in contract da sutlocaziun
En la gronda part dals cas disdeschan las locatarias u ils locataris. Sche la locatura As disdescha, pudais Vus contestar la disditga.

Disditga tras locatarias u locataris

Tut tenor contract pon valair differents termins da disditga u pli lungs ch'ils termins da disditga legals. Igl è dentant er pussaivel da disdir ordaifer il termin. Alura stuais Vus dentant chattar ina nova locataria u in nov locatari, per che Vus na stoppias betg pajar il tschains da locaziun fin il termin da disditga ordinari.
Sche pliras persunas han suttascrit il contract da locaziun, ston tuttas e tuts suttascriver la disditga. En cas d'ina famiglia u d'in partenadi registrà pudais Vus mo disdir cun il consentiment da l'autra persuna, er sche mo ina locataria resp. in locatari ha suttascrit. In motiv per la disditga na stuais Vus betg inditgar. Tramettai Vossa brev da disditga per posta recumandada al locatur.
Per formular la disditga As po gidar il model da l'Associaziun svizra da las locatarias e dals locataris.

Disditga tras locatura u locatur

En Svizra exista l'uschenumnada libertad da disditga. Quai vul dir che la locatura u il locatur po da princip disdir il contract da locaziun per in motiv betg definì. Ella u el sto dentant observar ils termins en la lescha u en il contract e far la disditga cun in formular uffizial.
Sco locataria u locatari avais Vus il dretg da vegnir a savair il motiv da la disditga. Sche quella è abusiva, pudais Vus As defender cunter questa decisiun. Abusiva è la disditga per exempel, sche Vus avais dumandà per ina reducziun dal tschains da locaziun u per l'eliminaziun d'ina mancanza u sche Vossas relaziuns famigliaras èn sa midadas. Alura pudais Vus contestar la disditga entaifer 30 dis tar l'autoritad da mediaziun da Vossa vischnanca.
Sche la disditga è valaivla, avais Vus en cas da direzza – per exempel en cas da relaziuns finanzialas stretgas, en cas da malsogna u pervia da las relaziuns sin il martgà d'abitaziuns da locaziun – il dretg sin ina prolungaziun da la relaziun da locaziun.
Il contract da fittanza è sumegliant sco il contract da locaziun. La differenza: Il bain immobigliar u l'object da locaziun na vegn betg mo surlaschà per il diever, mabain er per l'utilisaziun economica.
La fittadina na prenda pia betg mo a fit ina chaussa da l'affittadra, mabain survegn er il dretg da duvrar l'edifizi u il terren – per exempel per cultivar il terren u per gestiunar ina stalla da chavals. Sco fittadin As obligais Vus da pajar in tschains da fittanza (daners u part dal retgav) e da surpigliar ils custs per il mantegniment dal manaschi prendì a fit (cun excepziun da reparaturas pli grondas).
Exempels per ina fittanza:

  • Fittanza d'in restaurant, d'ina bar, d'in hotel

  • Fittanza d'in iert schrebertin per far diever da tal

  • Fittanza d'in bain immobigliar agricul ((Link auf Kantonsseiten))

  • Fittanza d'ina interpresa

  • Uffizi federal d'abitaziuns UFAB (admin.ch)

  • Federaziuns da locaturs e da locataris

  • L'autoritad da mediaziun

Tut ils temas

In servetsch da la Confederaziun, dals chantuns e da las vischnancas

Davart ch.chInfurmaziuns giuridicas
Link YoutubeLink Twitter
VoteInfo