Votaziun dal pievel dals 28 da settember 2025

Ils 28 da settember 2025 vegn la populaziun a votar davart il Conclus federal davart las taglias immobigliaras chantunalas sin abitaziuns secundaras.

Tgi che posseda ina immobiglia e fa diever sez da tala, sto pajar ina taglia sin las entradas per l'uschenumnada valur da l'atgna locaziun. Da l'autra vart pon ils tschains da debits ed ils custs da mantegniment vegnir deducids da las entradas. Il parlament ha approvà ina midada da lescha, che abolescha l'imposiziun da taglia sin la valur da l'atgna locaziun e che restrenscha las pussaivladads da deducziun. Quai vala per emprimas e per segundas abitaziuns. Il medem mument ha il parlament concludì ina midada constituziunala, che permetta als chantuns d'introducir ina taglia immobigliara speziala sin abitaziuns secundaras che servan per gronda part a l'agen diever.

Perquai che midadas constituziunalas ston vegnir acceptadas dal pievel e dals chantuns, datti ina votaziun davart questa taglia immobigliara speziala. Cunquai che l'aboliziun da l'imposiziun da taglia sin la valur da l'atgna locaziun è colliada giuridicamain cun la midada constituziunala, decida la votaziun davart l'entira refurma: Sche la taglia immobigliara speziala vegn refusada, resta l'imposiziun da taglia sin la valur da l'atgna locaziun en vigur. La refurma influenzescha la chargia fiscala da las proprietarias e dals proprietaris d'abitaziuns e pia er las entradas da la Confederaziun, dals chantuns e da las vischnancas. Sch'i resultan damain u dapli entradas, dependa fermamain da l'autezza dal nivel dals tschains ipotecars. En connex cun las abitaziuns secundaras dependi er da la dumonda, sche e co ch'ils chantuns realiseschan la taglia immobigliara speziala. En spezial ils chantuns turistics pudessan avair il basegn da cumpensar eventualas perditas d'entradas tar las abitaziuns secundaras.

Vulais Vus acceptar il Conclus federal dals 20 da december 2024 davart las taglias immobigliaras chantunalas sin abitaziuns secundaras?

L'aboliziun da l'imposiziun da taglia sin la valur da l'atgna locaziun simplifitgescha il sistem fiscal e reducescha la motivaziun da far debits privats. La taglia immobigliara speziala pussibilitescha als chantuns pertutgads da segirar lur entradas fiscalas sin abitaziuns secundaras.

Ina minoritad dal parlament refusa la refurma. Ina part da questa minoritad vul mantegnair l'imposiziun da taglia sin la valur da l'atgna locaziun, perquai che l'aboliziun va en emprima lingia a favur da las possessuras e dals possessurs d'ina atgna chasa u abitaziun e po chaschunar perditas d'entradas tar il stadi. In'autra part vul mantegnair almain l'imposiziun da taglia sin abitaziuns secundaras.

Ils 28 da settember 2025 vegn la populaziun a votar davart la Lescha federala davart la cumprova electronica da l'identitad ed auters meds da cumprova electronics (Lescha e-ID).

Tgi che vul empustar u dumandar insatge en l'internet, sto eventualmain s'identifitgar. Cun la cumprova electronica da l'identitad, l'uschenumnada e-ID, vegn quai ad esser pussaivel en moda cumplettamain digitalisada. La e-ID funcziunescha sco ina carta d'identitad digitala. En Svizra na datti actualmain nagina e-ID. L'onn 2021 han las votantas ed ils votants refusà l'introducziun d'ina e-ID, en spezial perquai che interpresas privatas avessan emess tala.

La nova lescha stgaffescha la basa per ina e-ID statala. Cun questa e-ID pon las utilisadras ed ils utilisaders s'identifitgar envers autoritads ed interpresas. Qua tras èsi per exempel pussaivel d'empustar il permiss da manischar electronic u da cumprovar la vegliadetgna per cumprar in product ch'è per­mess pir a partir d'ina tscherta vegliadetgna. L'utilisaziun da la e-ID è facultativa e gratuita. La nova lescha prevesa, che la Confederaziun emetta la e-ID e gestiunescha l'infrastructura tecnica necessaria. La protecziun da la sfera privata e la segi­rezza da las datas duain tras quai vegnir garantidas optimal­main. Er autras autoritads ed interpresas pon trair a niz l'infra­structura statala e porscher agens meds da cumprova electronics, per exempel la conferma da domicil u in attest da commem­branza. Cunter la Lescha e-ID èsi vegnì fatg in referendum. Pervia da quai datti ina votaziun.

Vulais Vus acceptar la Lescha federala dals 20 da december 2024 davart la cumprova electronica da l'identitaded auters meds da cumprova electronics (Lescha e-ID, LFEID)?

Il Cussegl federal ed il parlament vulan, che persunas possian s'identifitgar en moda facila e segira sin via electronica. La nova lescha stgaffescha la basa per ina cumprova electronica statala da l'identitad. La e-ID è impurtanta, per che la Svizra possia tegnair pass cun la digitalisaziun.

Ils comités da referendum crititgeschan, che la e-ID na saja betg segira e protegia mo insuffizientamain la sfera privata. I resultian grondas quantitads da datas sensiblas ed i possia dar abus e surveglianza. Ils comités teman er, che l'utilisaziun da la e-ID na restia betg facultativa.