L'Organisazun da las Svizras e dals Svizzers a l'exteriur (OSE) creescha raits tranter las Svizras ed ils Svizzers a l'exteriur. Sin la plattafurma swisscommunity.org porscha l'organisaziun ina gronda paletta da servetschs. Questa plattafurma permetta a las Svizras ed als Svizzers a l'exteriur da barattar infurmaziuns e da mantegnair contacts sin l'entir mund.

A l'exteriur datti passa 650 associaziuns ed instituziuns svizras. Chattai qua Vossa uniun svizra a l'exteriur.

I dat 18 scolas svizras a l'exteriur. Ellas porschan ina scolaziun tenor il model svizzer. Sin la pagina d'internet dal Departament federal d'affars exteriurs vegnis Vus a savair dapli davart las scolas svizras sin l'entir mund.

Education.suisse sustegna ils giuvenils svizzers a l'exteriur en connex cun lur scolaziun. Questa uniun è la centrala da la rait mundiala da las scolas svizras a l'exteriur. Ultra da quai cusseglia ella er ils giuvens svizzers a l'exteriur che vulan absolver ina scolaziun en Svizra.

Champs da vacanzas per uffants tranter 8 e 14 onns

Creschan Voss uffants si a l'exteriur e vulais Vus ch'els possian crear in liom cun lur pajais d'origin? La Fundaziun per ils uffants svizzers a l'exteriur organisescha champs da vacanzas en Svizra per uffants svizzers a l'exteriur. Uschia pon ils uffants passentar las vacanzas en lur pajais d'origin, independentamain da lur situaziun finanziala. Grazia a quests champs pon ils uffants far novas amicizias cun uffants svizzers che vivan en tuttas parts dal mund.

Purschida per giuvenils da 15 fin 25 onns

SwissCommunity permetta a persunas giuvnas svizras a l'exteriur d'emprender d'enconuscher meglier lur pajais d'origin. L'organisaziun porscha differents champs da stad e d'enviern en Svizra sco er curs da lingua online.

• Las purschidas da l'Organisaziun da las Svizras e dals Svizzers a l'exteriur SwissCommunity

• Las novitads da la Svizra per in public internaziunal sin swissinfo.ch

• Glista da las scolas svizras a l'exteriur dad Education suisse

• Sa registrar tar ina represchentanza svizra a l'exteriur

• Pro Helvetia sustegna l'art e la cultura svizra en Svizra ed a l'exteriur.

• Swissnex è la rait mundiala svizra ch'è responsabla per crear lioms en las domenas da la scolaziun, da la retschertga e da l'innovaziun.