La regenza da la Svizra sa cumpona da las set commembras e commembers dal Cussegl federal.

Ina commembra u in commember dal Cussegl federal ha mintgamai per in onn l'incumbensa da la presidenta u dal president da la Confederaziun. Ella u el maina las sesidas dal Cussegl federal. Plinavant represchenta questa persuna il Cussegl federal vers anora, per exempel a chaschun d'inscunters internaziunals. Cuntrari ad auters pajais n'ha la presidenta u il president da la Confederaziun da la Svizra strusch dapli cumpetenzas da decider che las ulteriuras commembras ed ils ulteriurs commembers dal Cussegl federal (guardar video).

Savens vegni discurrì d'in «otgavel cusseglier federal», dal chancelier federal. Quel ha ina funcziun da sustegnair e da cussegliar il Cussegl federal.

Mintga quatter onns elegia il parlament las commembras ed ils commembers dal Cussegl federal. El po reeleger ina commembra u in commember dal Cussegl federal uschè savens, sco che quel candidescha. La reelecziun è usitada. En ils blers cas terminescha il temp en il Cussegl federal perquai cun ina demissiun voluntara. Sche questa demissiun n'ha betg lieu sin la fin d'ina legislatura da quatter onns, elegia il parlament ina successura u in successur en ina elecziun substitutiva.

La regenza duai represchentar la populaziun svizra. Tar l'elecziun sto il parlament perquai resguardar differents criteris. Tenor constituziun sto el procurar, che las regiuns dal pajais e las regiuns linguisticas sajan represchentadas adequatamain. Per regla vegn plinavant resguardada la fermezza da las partidas politicas. Sco criteri per l'elecziun vala medemamain, che umens e dunnas duain esser represchentads circa tuttina bain en il Cussegl federal.

Ulteriuras infurmaziuns davart l'elecziun dal Cussegl federal vegnis Vus a savair en il video «Il pult da novizs daventa liber».

Il Cussegl federal regia la Svizra. El giuditgescha la situaziun politica e maina l'administraziun federala en connex cun la realisaziun da las incumbensas fundamentalas dal stadi.

Tar sias incumbensas tutga il suandant:

• Il Cussegl federal prepara novas leschas e suttametta quellas al parlament.

• Il Cussegl federal exequescha u realisescha las leschas ch'il parlament ha concludì. Per quest intent decretescha el ordinaziuns. Quellas preciseschan las disposiziuns legalas. Perquai vegn la regenza er numnada «executiva», pia «pussanza executiva».

• Il Cussegl federal maina l'administraziun federala cun ses set departaments. Mintga commembra e mintga commember dal Cussegl federal maina in departament.

• Il Cussegl federal represchenta la Svizra envers l'exteriur.

• Il Cussegl federal planisescha a lunga vista. El fixescha directivas e determinescha finamiras. El controllescha, sche las incumbensas èn vegnidas ademplidas e sche las finamiras èn vegnidas cuntanschidas. Il Cussegl federal planisescha ed examinescha er las finanzas federalas ch'il parlament approva.

Il Cussegl federal sto infurmar cuntinuadamain e detagliadamain ils chantuns, il parlament e la publicitad davart sias decisiuns ed intenziuns. Guardai il video «La communicaziun dal Cussegl federal», sche Vus vulais savair dapli en chaussa.

Ils champs d'incumbensa da la regenza cumpletteschan quels dal parlament e da las dretgiras. La separaziun da las pussanzas divida en Svizra la pussanza tranter quels trais acturs.

Per regla sa scuntra il Cussegl federal ina giada l'emna en il «Chalet fédéral», la stanza da sesidas dal Cussegl federal en la Chasa federala. Questa sesida ha mintgamai lieu la mesemna – danor durant las sessiuns dal parlament, alura vegn ella tegnida il venderdi. Il Cussegl federal discuta las fatschentas e prenda sias decisiuns.

A la sesida participeschan tut en tut diesch persunas: las set commembras e commembers dal Cussegl federal, il chancelier federal ed ils dus vicechanceliers.

Durant sia sesida emnila tracta il Cussegl federal fitg bleras fatschentas. Per onn èn quai passa 2500 fatschentas. Perquai dovri ina buna preparaziun. Ils set departaments e la Chanzlia federala sustegnan il Cussegl federal en la preparaziun. Dapli davart quest tema vegnis Vus a savair en il video «L'art da la buna preparaziun».

A la sesida sco tala dastgan mo las set commembras e commembers dal Cussegl federal decider. Ellas ed els han tuts ils medems dretgs e prendan lur decisiuns adina cuminaivlamain. Ellas ed els discutan durant la sesida dal Cussegl federal e tschertgan ina soluziun coordinada. Il Cussegl federal votescha mo, sch'el na chatta betg ina tala soluziun coordinada.

Sche la decisiun è prendida, represchentan tut las commembras ed ils commembers quella ensemen vers anora. Er sch'ella na correspunda betg a lur opiniun persunala u a la tenuta da lur partida. L'uschenumnà «princip colleghial» vegn er declerà en il video «En las sesidas adina la furma da curtaschia».