Tgi sto far militar e quant ditg?
Mintga Svizzer sto far servetsch militar u in servetsch da cumpensaziun civil (servetsch civil). Dunnas svizras pon s'annunziar voluntarmain. Per schuldads, per appuntads e per sutuffiziers dura l'obligaziun da servetsch fin la fin dal 10. onn chalendar suenter la promoziun. Il dumber da dis d'instrucziun sa drizza per regla tenor il grad e tenor la funcziun.
Di d'orientaziun
Tut ils Svizzers survegnan ina convocaziun al di d'orientaziun l'onn ch'els cumpleneschan il 18. onn da vegliadetgna. Là vegnan els infurmads davart il servetsch militar e davart la scola da recrut. E là inditgeschan els, cura ch'els vulan absolver la scola da recrut (tranter il 19. ed il 25. onn da vegliadetgna). Er las dunnas svizras vegnan envidadas al di d'orientaziun. Per ellas è quest di però facultativ.
Recrutaziun
Vus stuais absolver la recrutaziun il pli baud a partir dal cumenzament dal 19. onn da vegliadetgna e fin il pli tard la fin da l'onn che Vus cumplenis 24 onns. La recrutaziun dura dus fin trais dis. A chaschun da la recrutaziun constatescha ina media u in medi, sche Vus essas abel per il servetsch militar. Per quels ch'èn abels da far servetsch militar, ha lieu in discurs d'attribuziun. Là vegni eruì, en tge funcziun che Vus vegnis instruids en la scola da recrut.
Quant ditg dura la scola da recrut?
Vus pudais cumenzar cun la scola da recrut il pli baud 3 mais ed il pli tard 12 mais suenter la recrutaziun. Ella dura per regla 18 emnas. Ulteriuras infurmaziuns davart la procedura e davart ils termins chattais Vus sin la pagina d'internet da l'armada.
Dumandar congedi durant la scola da recrut
Durant la scola da recrut han ils appartegnents da l'armada il dretg d'in congedi da dus dis che pon vegnir tschernids libramain. La dumonda da congedi stuais Vus inoltrar en scrit a Voss cumandant. Ina motivaziun n'è betg necessaria.
Sche Vus duvrais in congedi persunal, inoltrais Vus – sche pussaivel gia avant il servetsch – ina dumonda da congedi en scrit a Voss cumandant. Vus stuais motivar Vossa dumonda ed agiuntar las cumprovas u confermas correspundentas.
Vus pudais dumandar in congedi persunal er durant il servetsch en cas imprevisibels ed en cas d'urgenza, p.ex. sch'igl ha dà in mortori en famiglia.
Spustar la scola da recrut
Stuais Vus spustar la scola da recrut pervia da la professiun, pervia dal studi u per motivs medicinals? Inoltrai uschè baud sco pussaivel ina dumonda a l'autoritad militara da Voss chantun. La dumonda sto vegnir suttascritta e motivada e sto cuntegnair las cumprovas u confermas correspundentas. Spustaments èn per regla pussaivels.
Recrutads che n'han betg absolvì la scola da recrut a la fin da l'onn ch'els cumpleneschan 25 onns, vegnan relaschads da l'armada e ston pajar la taglia militara.
Nua, cura e quant ditg
Suenter la scola da recrut restais Vus incorporads en l'armada per 9 onns. Durant quest temp faschais Vus sis curs da repetiziun da mintgamai 3 emnas. A la fin dal 10. onn chalendar che Vus na faschais pli nagins curs da repetiziun, vegnis Vus relaschà da l'obligaziun da far servetsch militar.
Las datas dals curs da repetiziun (datas da convocaziun) vegnan publitgadas a temp sin la pagina d'internet da l'Armada svizra. Il pli tard 21 emnas avant il curs da repetiziun survegnis Vus in'annunzia da servetsch per posta u sin via electronica. Nua che Voss servetsch ha lieu, è inditgà en il cumond da marschar. Quel survegnis Vus il pli tard 6 emnas avant il cumenzament dal curs da repetiziun per posta u sin via electronica.
Spustar in curs da repetiziun
Stuais Vus spustar il curs da repetiziun pervia da la professiun, pervia dal studi u per motivs medicinals? Inoltrai uschè baud sco pussaivel ina dumonda a l'autoritad militara da Voss chantun da domicil. La dumonda sto vegnir suttascritta e motivada e sto cuntegnair las cumprovas u confermas correspundentas. Spustaments èn per regla pussaivels. Sche la dumonda vegn approvada e sche Vus na faschais quel onn nagins servetschs pli, stuais Vus pajar la taglia militara.
Protecziun cunter ina disditga
Vossa patruna u Voss patrun na dastga betg disdir Vossa plazza durant Voss temp da servetsch sco er 4 emnas avant e 4 emnas suenter il servetsch. Cundiziun: Voss servetsch dura almain 11 dis e Vus n'essas betg pli en il temp d'emprova.
Cumpensaziun dal gudogn e sold
Tgi che fa militar, na po betg lavurar. La perdita dal gudogn vegn cumpensada tras in sold e tras ina cumpensaziun dal gudogn.
La cumpensaziun dal gudogn importa 69.– francs brutto per di u 80 % da l'ultim salari, sche Vus avais lavurà almain 4 emnas u 160 uras entaifer ils ultims 12 mais avant il servetsch. Per la scola da recrut importa il supplement en mintga cas 69.– francs brutto per di per persunas senza uffants.
Il sold sa drizza tenor il grad militar. Ina recruta u in recrut survegn in sold da 6.– francs per di. Il sold na sto betg vegnir declerà en la taglia sco entradas.
Tgi che appartegna a l'armada ed ha survegnì in schluppet d'assagl, sto absolver mintga onn in exercizi da tir tar in'uniun da tiradurs. Questa obligaziun dura fin l'onn avant la relaschada da l'armada.
Servetsch d'infurmaziun per tut las dumondas davart Voss servetsch militar: tel. +41 800 424 111
Purschidas da plazzas tar l'Armada svizra