Intent da la 3. pitga
Sche Vus vulais cumplettar Vossa 1. pitga e Vossa 2. pitga ed uschia procurar che Vus survegnias ulteriurs daners suenter il pensiunament, pudais Vus far voluntarmain ina 3. pitga. I dat dus tips da la 3. pitga: il provediment individual lià (pitga 3a) ed il provediment individual nunlià (pitga 3b).
Provediment individual lià (pitga 3a)
Cun la pitga 3a pudais Vus accumular durant Vossa vita professiunala fin al pensiunament in dabun da spargn tar ina banca u tar in’assicuranza.
Las caracteristicas las pli impurtantas da la pitga 3a:
Vus pudais pajar mintg’onn ina summa maximala sin Voss conto.
Ils tschains èn pli auts che tar in conto da spargn.
Las contribuziuns che Vus pajais pon vegnir deducidas mintg’onn da la taglia.
Per la retratga dal dabun valan tschertas disposiziuns.
Sch'ins retira il dabun, ston ins pajar ina taglia unica che sa drizza tenor las entradas il mument da la retratga.
Provediment individual nunlià (pitga 3b)
Tar la pitga 3b sa tracti da deposits da spargn en furma da daners bluts, da cudeschets da spargn, d'assicuranzas da vita u d'investiziuns.
Las caracteristicas las pli impurtantas da la pitga 3b:
Vus pudais pajar mintg’onn contribuziuns d'ina summa tenor Vossa tscherna.
Il dabun spargnà stuais Vus inditgar en la decleraziun da taglia.
En general stoi vegnir pajà mintg’onn taglia per il dabun.
Vus pudais laschar pajar ora ils daners da tut temp.
Vus na stuais pajar naginas taglias supplementaras, sche Vus retirais ils daners spargnads.
En ils suandants cas pudais Vus far e cuntinuar cun ina pitga 3a:
Vus pajais contribuziuns a la 2. pitga (en general èn quai emploiadas ed emploiads).
Vus n’essas betg assicurada u assicurà tar ina instituziun da provediment tenor la LPP (en general èn quai persunas cun in'activitad da gudogn independenta).
Vus abitais a l’exteriur, lavurais dentant en Svizra (p.ex. cunfinarias e cunfinaris).
Vus survegnis diarias d'ina assicuranza svizra cunter la dischoccupaziun.
Vus essas ina persuna assicurada cun ina invaliditad parziala ed avais entradas suttamessas a la AVS.
Sche Vus avais cuntanschì la vegliadetgna da renta ordinaria, ma cuntinuais da lavurar, pudais Vus pajar vinavant las contribuziuns fin 5 onns suenter Voss 65. anniversari (umens) u suenter Voss 64. anniversari (dunnas).
Vus pudais er pajar vinavant contribuziuns, sche Vus interrumpais temporarmain l'activitad da gudogn (p.ex. servetsch civil u militar, dischoccupaziun, malsogna).
Per la pitga 3b na datti naginas premissas spezialas.
Las instituziuns da provediment As pon infurmar detagliadamain davart la conclusiun d'ina 3. pitga.
Vus pudais pajar mintg’onn ina summa maximala en la pitga 3a.
Per emploiadas ed emploiads èn quai l’onn 2023 maximalmain 7056 francs. Per persunas cun in'activitad da gudogn independenta senza 2. pitga èn quai fin 20 pertschient da las entradas e maximalmain 35 280 francs.
Per la pitga 3b na datti naginas limitas maximalas ad onn.
Sche Vus As decidais per ina pitga 3a, pudais Vus profitar d'avantatgs fiscals: Vus pudais numnadamain deducir las summas pajadas da la decleraziun da taglia annuala.
Emploiadas ed emploiads pon deducir la summa maximala per l’onn fiscal current (summa l’onn 2023: 7056 francs).
Persunas cun in'activitad da gudogn independenta senza 2. pitga pon deducir fin 20 pertschient da las entradas e maximalmain 35 280 francs (summa l’onn 2023).
Resguardai per plaschair: Cura che Vus retirais il dabun, stuais Vus pajar ina taglia pauschala unica.
Per la pitga 3b na datti per regla nagins avantatgs fiscals.
Cuntrari a la pitga 3a na stuais Vus percunter pajar nagina taglia, cura che Vus retirais il dabun total spargnà.
Vossa instituziun da provediment u l'autoritad fiscala da Voss chantun As po infurmar en detagl davart quest tema.
Normalmain pudais Vus As laschar pajar ora ils daners da la 3. pitga il mument da Voss pensiunament u – il pli baud – 5 onns avant la vegliadetgna da renta ordinaria (64 onns per dunnas e 65 onns per umens) .
En ils suandants cas excepziunals avais Vus la pussaivladad da retrair anticipadamain il chapital:
Vus planisais da cumprar u da bajegiar proprietad d’abitar.
Vus bandunais definitivamain la Svizra.
Vus avais l’intent da cumenzar cun in'activitad da gudogn independenta.
Vus avais l’intent d'As deditgar ad ina nova activitad independenta.
Vus vulais cumprar onns da contribuziun supplementars tar ina instituziun da provediment da la 2. pitga.
Vus retschavais ina renta entira da l’assicuranza d’invaliditad (AI) e la ristga d’invaliditad n’è betg assicurada.
Sche Vus decidais da lavurar anc suenter la vegliadetgna da renta ordinaria (64 resp. 65 onns), pudais Vus pajar vinavant contribuziuns e spustar la retratga per maximalmain 5 onns.
Cura che Vus retirais il chapital, stuais Vus laschar pajar ora l'entir dabun en ina giada.
Per retrair il chapital da provediment da la pitga 3b na datti naginas cundiziuns. E Vus pudais retrair il chapital da tut temp.
Vossa instituziun da provediment As po infurmar en detagl davart las cundiziuns e davart las modalitads d'ina retratga dal chapital.
Sin la pagina Il provediment da vegliadetgna vegn explitgà il funcziunament da las trais pitgas che furman il provediment da vegliadetgna svizzer.
Per infurmaziuns pli detagliadas davart il provediment da vegliadetgna pudais Vus consultar la pagina Il provediment individual lià (pitga 3a) da l’Uffizi federal d’assicuranzas socialas u chargiar giu la broschura «Il provediment da vegliadetgna svizzer».
Vossa instituziun da provediment u l’autoritad da taglia da Voss chantun As po infurmar en detagl davart ils avantatgs fiscals d'ina pitga 3a u 3b.