In numer da la AVS survegnan tut las persunas che vivan u lavuran en Svizra: El serva sco numer d’assicuranza sociala. Vus al duvrais dentant er en auters champs administrativs.
Il numer sa cumpona da 13 cifras. El è anonim e vegn generà en moda casuala. I n’è betg pussaivel d’identifitgar ina persuna a maun dal numer.
En cas che Vus vivais u lavurais en Svizra, survegnis Vus in numer da la AVS – independentamain da Vossa naziunalitad. Er cunfinarias e cunfinaris survegnan in numer da la AVS.
Vus chattais il numer da la AVS sin Vossa carta d’assicuranza da malsauns.
Sche Vus avais in’activitad da gudogn independenta, pudais Vus As drizzar a Vossa cassa da cumpensaziun (cassa da cumpensaziun professiunala u cassa da cumpensaziun da Voss chantun da domicil).
En cas che Vus na vivais betg en Svizra e n’essas betg emploiada u emploià tar ina interpresa svizra a l’exteriur, pudais Vus vegnir a savair Voss numer da la AVS sur la cassa da cumpensaziun svizra.
Voss numer da la AVS resta valaivel per vita duranta. Sche Vus avais bandunà la Svizra e na lavurais betg per ina interpresa svizra, stuais Vus empustar in duplicat da Voss certificat d’assicuranza cun agid da quest formular per chattar ora Voss numer da la AVS.
Per chattar ora Voss numer da la AVS, contactai directamain Voss institut da scolaziun. Vus pudais er dumandar in certificat d’assicuranza tar la cassa chantunala da cumpensaziun da Voss lieu da studi cun agid da quest formular.
Mintga uffant che viva en Svizra survegn in numer da la AVS.
Il numer da la AVS da Voss uffants chattais Vus perquai sin lur carta da l’assicuranza da malsauns u cun As infurmar tar la cassa da malsauns da Voss uffant.
Dapli davart il numer da la AVS chattais Vus sin las paginas Il numer da la AVS da l'Uffizi federal d'assicuranzas socialas (UFAS) ed Empustar il certificat da la AVS da ch.ch.