Maridaglia en Svizra

Tge preparaziuns dovri per la maridaglia?

Per pudair maridar en Svizra stuais Vus e Vossa conjugala futura u Voss conjugal futur ademplir diversas premissas:

Vus stuais avair almain 18 onns.
Vus stuais esser abla u abel da giuditgar.
Vus na dastgais betg gia esser maridada u maridà u viver en in partenadi registrà.
Sche Vus n’avais betg il dretg da burgais svizzer, stuais Vus – tut tenor il pajais d’origin – avair in visum d’entrada per pudair maridar en Svizra.

Sche Vus ademplis questas premissas, pudais Vus annunziar Vossa intenziun da maridar a l'uffizi da stadi civil da Voss domicil.

L’uffizi da stadi civil As supplitgescha d'emplenir il formular «Preparaziun per la maridaglia» ed As communitgescha tge ulteriurs documents che Vus stuais preschentar.

Maridaglia

Sche Vus avais fatg tut las preparaziuns necessarias per las nozzas civilas e sche tut è en urden, As dat l'uffizi da stadi civil la permissiun da maridar. Quella vala 3 mais.

Vus pudais maridar tar l’uffizi da stadi civil da Voss domicil u – sche Vus vulais – tar in auter uffizi da stadi civil en Svizra.

Durant la maridaglia ston esser preschentas duas perditgas da matrimoni. Ellas ston esser maiorennas ed ablas da giuditgar.

Suenter la maridaglia survegnis Vus in document da maridaglia. Quest document attesta spezialmain il lieu e la data da la maridaglia sco er ils nums dals conjugals avant e suenter la maridaglia.

Suenter las nozzas civilas pudais Vus – sche Vus vulais – er maridar en baselgia. Co che Vus stuais proceder, vegnis Vus a savair tar Vossa cuminanza religiusa.

Custs da la maridaglia

Num suenter la maridaglia

En Svizra pon ils conjugals salvar lur num suenter la maridaglia. Els pon dentant er eleger il num da la conjugala u dal conjugal sco num da famiglia cuminaivel.

Resguardai:

Nums dubels or da nums da la conjugala e dal conjugal sco «Müller Huber» n’èn betg pussaivels.
Uschenumnads nums d’allianza cun stritgins tranter ils nums da la conjugala e dal conjugal (p.ex. Müller-Huber) èn vinavant permess. Els na vegnan però betg inscrits en il register da stadi civil. Dentant pon els vegnir duvrads en il mintgadi e vegnir inscrits – sin giavisch – sin la carta d’identitad ed en il passaport.

Tge èsi da far suenter la maridaglia?

Suenter la maridaglia è Voss nov stadi civil «maridada» u «maridà».

Quest fatg sco er in'eventuala midada dal num stuais Vus annunziar a l’administraziun communala, a l'administraziun chantunala da taglia, a Voss patrun, a Vossa banca, a la Posta ed a las assicuranzas.

Sche Vus avais midà il num, resguardai che Vus stuais er laschar midar la carta d’identitad, il passaport, il permiss da manischar, las cartas da banca e las cartas da credit.

Maridaglia e dretg da burgais svizzer

Maridaglia a l’exteriur

Preparaziun

Sche Vus vulais maridar a l’exteriur, vala per Vus in proceder specific. Concretamain vul quai dir:

Vus stuais dumandar tar l’uffizi da stadi civil dal lieu, nua che Vus vulais maridar, tge documents che Vus stuais purtar da la Svizra.
Vus stuais infurmar l'ambassada svizra u il consulat svizzer en il pajais, nua che Vus vulais maridar, davart questa intenziun.
Sche Vossa conjugala futura u Voss conjugal futur è da l’exteriur, stuais Vus dumandar tar l'autoritad da migraziun da Voss chantun da domicil u tar l'ambassada svizra u il consulat svizzer, sut tge premissas che Vossa conjugala u Voss conjugal dastga entrar ed abitar en Svizra.

Renconuschientscha da la lètg en Svizra

Sche la conjugala u il conjugal ubain tuts dus han il dretg da burgais svizzer, ston ins trametter ils documents, ch'ins ha survegnì suenter la maridaglia, a l’ambassada svizra u al consulat svizzer en il pajais correspundent: L'ambassada u il consulat transmetta ils documents a l'uffizi da stadi civil da l'agen domicil en Svizra.

Sche la conjugala u il conjugal n'ha betg il dretg da burgais svizzer, vegnan per il solit pretendids ulteriurs documents. As infurmai a temp tar la represchentanza svizra en il pajais correspundent davart ils documents necessaris.

En cas che tuts dus conjugals èn da l’exteriur, contactai l'autoritad da migraziun da Voss chantun da domicil. Quella è responsabla per la procedura da renconuschientscha.

Ulteriuras infurmaziuns e contacts

Infurmaziuns supplementaras davart la maridaglia, davart la procedura da preparaziun da la lètg en Svizra ed a l’exteriur sco er davart la tscherna dal num chattais Vus sin las suandantas paginas d’internet:

Las infurmaziuns davart las consequenzas finanzialas dal matrimoni e davart la tgira genituriala chattais Vus sin las paginas correspundentas da quest portal.

Per dumondas individualas davart il matrimoni As drizzai ad in'advocata u ad in advocat, a l’uffizi da stadi civil da Vossa vischnanca da domicil u a la represchentanza svizra a l’exteriur.

Tschertga

Maridaglia