L’attest da paja svizzer è in formular ch’è destinà a las lavurantas ed als lavurants e che cuntegna infurmaziuns davart il salari pajà da la patruna u dal patrun. En l’attest èn inditgadas tut las contribuziuns, las prestaziuns ed ils supplements.
Vossa patruna u Voss patrun As sto emetter in attest da paja annual. Normalmain al survegnis Vus la fin schaner. Per cas che Vus avais pliras plazzas da lavur u sche Vus avais midà plazza en il decurs da l’onn survegnis Vus in attest per mintga plazza.
L’attest da paja è document il pli impurtant per la decleraziun da taglia. En differents chantuns al tramettan ils patruns directamain a las autoritads da taglia. Sco lavuranta u lavurant stuais Vus en quest cas mo agiuntar l’attest a la decleraziun da taglia, sche Vus lavurais tar ina patruna u in patrun extrachantunal u sche la patruna u il patrun n’al inoltrescha betg automaticamain a las autoritads da taglia.
Sche Vossa patruna u Voss patrun n’As ha betg tramess l’attest da paja, sche quel cuntegna sbagls u sche Vus l’avais pers, stuais Vus dumandar directamain la patruna u il patrun per in nov attest da paja.
Sche Vus essas patruna u patrun da lavur e na savais betg co proceder, suandai l’instrucziun da l’Administraziun federala da taglia per emetter in attest da paja. Exempels da formulars èn avant maun en differents formats.
Vus pudais medemamain utilisar la software gratuita per emetter in attest da paja electronic.
L’Administraziun federala da taglia porscha ina glista cun las dumondas las pli frequentas davart l’attest da paja.
La glista da las administraziuns chantunalas da taglia As infurmescha davart ils posts en Voss chantun che porschan infurmaziuns e documents davart l’attest da paja.