Locataris che vulan bandunar lur abitaziun ston disdir en scrit – il meglier cun ina brev recumandada – lur contract da locaziun entaifer il termin. Sch'els èn maridads u sch'els vivan en in partenadi registrà vala la disditga mo, sch'ella è suttascritta da tuts dus partenaris. Il termin da disditga per abitaziuns importa per regla trais mais. Ins sto far attenziun che la disditga arrivia a temp tar il locatur (in di avant il termin da disditga). Ils termins da disditga èn fixads en il contract da locaziun, uschiglio valan ils termins d'usit local. Quels survegnan ins tar las autoritads da mediaziun.
Uschespert che Vus avais suttascrit in contract da locaziun, valan ils termins da disditga fixads en il contract. Suttascrivai pir cura che Vus avais definitivamain interess per l’immobiglia. La presumziun currenta, ch’ins possia sa retrair entaifer 5 dis dal contract suttascrit, na constat betg.
Sche Vus vulais bandunar anticipadamain l'abitaziun e sche Vus vulais evitar da stuair pajar il tschains da locaziun fin ch'il contract è terminà, stuais Vus proponer in nov locatari ch'è acceptabel per il locatur: Il nov locatari sto esser solvent e sto esser pront da surpigliar il contract da locaziun per las medemas cundiziuns. Il locatur ha temp fin 30 dis per examinar, sch'il locatari substitutiv è en cas d'ademplir il contract da locaziun e da pajar il tschains da locaziun.
Autoritad chantunala da mediaziun (infurmaziuns, cussegliaziun, models)
L'autoritad da mediaziun infurmescha e cusseglia tant ils locataris sco er ils locaturs. Tar l'autoritad da mediaziun pon vegnir retratgs ils formulars necessaris.
Associaziuns da locataris resp. da locaturs
Er las associaziuns da locataris resp. da locaturs sustegnan las dumondas ed ils interess dals locataris resp. dals locaturs en connex cun la disditga.