Tar ina votaziun davart ina lescha u davart tscherts contracts internaziunals basta la maioritad dal pievel. In tal project da votaziun è pia acceptà, sche la maioritad da las votantas e dals votants di «gea» ad el.
La gronda part dals contracts internaziunals è suttamessa a la maioritad dal pievel. Per midadas da la Constituziun e per l’adesiun a communitads supranaziunalas dovri l’uschenumnada maioritad dubla. In tal project è acceptà, sche la maioritad da las votantas e dals votants di «gea» ad el (maioritad dal pievel) e sche er la maioritad dals chantuns l’approvescha (maioritad dals chantuns).
Per la maioritad dals chantuns vegnan dumbrads ils resultats da la votaziun dals singuls chantuns. Sche la maioritad da las votantas e dals votants d'in chantun han ditg «gea» al project, vala la vusch da quest chantun sco in «gea». Maioritad dals chantuns vul dir, ch’ina maioritad dals chantuns ha ditg «gea». Las vuschs dals anteriurs mez-chantuns Sursilvania, Sutsilvania, Basilea-Citad, Basilea-Champagna, Appenzell Dador ed Appenzell Dadens valan mintgamai sco ina mesa vusch.