Da far attenziun:
Avri precautamain la cuverta, faschai attenziun da betg stgarpar quella: Per ordinari vegn la cuverta numnadamain reutilisada sco cuverta da resposta per la votaziun per correspundenza. Consultai ils detagls tar quest punct en il manual da votaziun che Vus avais survegnì da Vossa vischnanca.
Sche Vus avais la pussaivladad da votar en Voss chantun sin via electronica, e sche Vus vulais profitar da questa occasiun, observai las instrucziuns respectivas che Vus avais survegnì per posta.
il carnet cotschen cun las explicaziuns da votaziun dal Cussegl federal;
la cuverta da resposta (per regla è quai la medema cuverta che la vischnanca ha duvrà per trametter il material da votar).
il cedel da votar;
En la gronda part dals chantuns cuntegna il material da votar plinavant er:
l'attest da votar;
la cuverta, en la quala Vus stuais metter il cedel da votar;
Da far attenziun:
Tut tenor il chantun e la vischnanca sa differenzieschan la cuverta da resposta, l'attest da votar e la cuverta da votar areguard la grondezza e la colur.
Sche Vus n'avais insumma betg survegnì il material da votar, avais survegnì mo ina part da quel ubain tut en la faussa lingua naziunala (votaziuns federalas), As recumandain nus da contactar Vossa vischnanca da domicil ch'è responsabla per la spediziun. Sche Vus vivais a l’exteriur, contactai p.pl. Voss’ultima vischnanca da domicil en Svizra ubain, sche Vus n’avais betg gì ina tala, Voss lieu d’origin.
Sch'i dat ensemen cun la votaziun federala er ina votaziun en Voss chantun u en Vossa vischnanca, cuntegna il material da votar che Vus survegnis er ils cedels da votar e las infurmaziuns davart la votaziun ubain elecziun chantunala u communala.
Legiai las explicaziuns dal Cussegl federal, e consultai las paginas davart las votaziuns correspundentas sin las paginas d'internet uffizialas admin.ch, parlament.ch e ch.ch sco er sin il chanal da Youtube dal Cussegl federal.
Ulteriuras funtaunas d'infurmaziun èn las paginas d'internet da las differentas partidas politicas sco er dals comités d'iniziativa e da referendum, las gasettas sco er las emissiuns politicas da radio e televisiun
Sche Vus As sentis pront da respunder las dumondas dals cedels da votar uffizials, prendai in culli e scrivai Vossa resposta.
Da far attenziun:
Duvrai mo il material da votar uffizial che Vus avais survegnì da la vischnanca.
Duvrai adina in culli e mai in rispli per scriver Vossa resposta.
En la gronda part dals chantuns / da las vischnancas stuais Vus scriver gea u na. En intgins chantuns / vischnancas, nua che las vuschs vegnan dumbradas cun ina maschina, stuais Vus percunter mo far ina crusch en il lieu respectiv sin il cedel da votar prestampà cun gea e na.
Sche Vus na vulais betg respunder ina u pliras dumondas da votaziun, pudais Vus laschar vid il cedel da votar en quest lieu. Il cedel da votar n'è betg nunvalaivel perquai, mabain vala sco cedel da votar vid. N'agiuntai betg commentaris, skizzas, dissegns u auters elements che na tutgan betg tar la dumonda da votaziun.
Na tartagnai betg il material e na curregi betg sbagls cun tipex u cun chaussas sumegliantas; en in tal cas contactai per plaschair Vossa vischnanca.
Ussa sa tracti da transferir Vossa vusch a la vischnanca. Vus pudais tscherner ina da las suandantas pussaivladads:
Vus votais per correspundenza.
Vus mettais Vossa cuverta en la chascha da brevs da la vischnanca che sa chatta per ordinari tar l'administraziun communala. La cuverta sto vegnir messa en la chascha da brevs da la vischnanca fin las uras ch'èn inditgadas en la brev d'infurmaziun che Vus avais survegnì cun il material da votar.
Vus giais quels dis e quellas uras, ch'èn inditgadas en la brev d'infurmaziun, che Vus avais survegnì cun il material da votar, al local da votaziun.
Sche Vus votais per correspundenza u mettais Vossa cuverta en la chascha da brevs da Vossa vischnanca:
Mettai il cedel da votar emplenì en la cuverta ch'è previsa per quai. En la gronda part dals cas sto quella suenter vegnir tatgada giu. Las disposiziuns respectivas vertentas chattais Vus en il manual da votaziun da Voss chantun.
Sche Vus vulais consegnar Vossa vusch en il local da votaziun da Vossa vischnanca è la regla generala:
Mettai Voss cedel da votar en la cuverta da votaziun e giai cun quella al local da votaziun. Là vegn verifitgada Vossa identitad (prendai cun Vus in document che cumprova Vossa identitad e l'attest da votar) e vegnan prendids en consegna Voss cedel da votar e Vossa cuverta da votaziun.
Da far attenziun:
Duvrai mo il material da votar uffizial. Sche Vus avais pers u stgarpà quel, contactai per plaschair Vossa vischnanca.
Vossa cuverta da votaziun dastga cuntegnair mo Voss cedel da votar e betg quel d'ina autra persuna u d'ina persuna parenta.
Sche Vus As avais decidì da votar per correspundenza, mettai la cuverta da votar ensemen cun l'attest da votar en la gronda cuverta da resposta.
Da far attenziun:
L'attest da votar sto per regla vegnir suttascrit a maun. En intgins chantuns sto ultra da quai vegnir inditgada la data da naschientscha. Las disposiziuns respectivas vertentas chattais Vus en il manual da votaziun da Voss chantun.
En la cuverta da resposta na pon vegnir mess nagins auters documents che quels dal material da votar uffizial.
Cur che Vus avais mess il material en la cuverta da resposta, controllai che l'adressa da Vossa vischnanca saja bain visibla.
Per regla sto la cuverta da resposta vegnir tatgada giu. Legiai en quest reguard cun attenziun las instrucziuns da votaziun che valan en Voss chantun.
Da far attenziun: Sche Vus avais stgarpà la cuverta cun il material da votar u sche Vus na chattais betg pli quella / u l'avais persa, contactai immediatamain Vossa vischnanca.
Tut tenor il chantun e la vischnanca sto la cuverta da resposta vegnir francada u betg. Resguardai ils differents termins da consegna da la posta A e B.
Da far attenziun: Per la spediziun en Svizra vegn recumandà da metter sin posta la cuverta che vegn tramessa per posta A la gievgia e quella che vegn tramessa per posta B il mardi. Las infurmaziuns respectivas per ils singuls chantuns As vegnan per regla tramessas cun il material da votar. Las Svizras ed ils Svizzers a l'exteriur ston calcular dapli temp.