Il pli baud 4 emnas ed il pli tard 3 emnas avant ina votaziun u in'elecziun federala survegnis Vus il material correspundent per posta. A partir da quel mument pudais Vus votar u eleger per correspundenza. Na spetgai betg memia ditg. Ultim termin: per posta A la gievgia, per posta B il mardi avant la votaziun u l'elecziun.

Cura e co che Vus pudais votar ed eleger a l'urna, stat normalmain scrit en la cuverta cun il material da votar u d'eleger.

Votar ed eleger per correspundenza

Vus pudais dar giu Vossa vusch per correspundenza. Per quest intent emplenis Vus il cedel da votar e tramettais quel per posta a Vossa vischnanca. Vus stuais duvrar il material da votar u d'eleger che Vus avais survegnì per posta. Tut tenor il chantun u la vischnanca stuais Vus francar sez la cuverta da resposta.

En intgins lieus pudais Vus metter Vossa cuverta gia avant la dumengia da votaziun u d'elecziun en la chascha da brevs da la vischnanca u en ina chascha ch'è vegnida installada spezialmain per la votaziun u l'elecziun. En quests cas na stuais Vus betg francar Vossa cuverta. Vus pudais dumandar Vossa vischnanca, fin cura che Vus pudais metter Vossa cuverta en la chascha.

Votar ed eleger a l'urna

Vus pudais dar giu Vossa vusch directamain a l'urna. Prendai il material da votar u d'eleger cun Vus en il local da votaziun da Vossa vischnanca da domicil. Là stuais Vus preschentar ina carta d'identitad u in passaport.

As infurmai ordavant, nua ch'il local da votaziun da Vossa vischnanca sa chatta sco er cura ch'el è avert. Questas infurmaziuns stattan normalmain scrittas sin la cuverta che cuntegna il material da votar u d'eleger. As drizzai en cas d'intschertezzas directamain a Vossa vischnanca.

E-voting

En intgins chantuns èsi pussaivel da votar per internet. I sa tracta qua d'emprovas per in dumber limità da votantas e votants. Dapli davart quest tema vegnis Vus a savair en l'artitgel davart e-voting.