Curtamain
Ils ultims decennis ha la Svizra fatg progress en divers secturs da l'ambient. Da las resursas natiralas vegni fatg diever en moda pli effizienta ed il consum per persuna da la populaziun svizra engrevgescha l'ambient main ferm che anc avant 20 onns. Tuttina vegnan las basas da viver natiralas sco l'aua, il terren e l'aria anc adina strapatschadas fermamain, e quai sin l'entir mund ed er en Svizra – savens uschè ferm ch'ellas na pon betg sa revegnir. Quai po avair consequenzas negativas per las cundiziuns da viver.
L'Iniziativa da responsabladad per l'ambient pretenda, che las activitads economicas na dastgian betg duvrar dapli resursas ed emetter dapli substanzas nuschaivlas, che quai ch'il mantegniment da las basas da viver natiralas permetta. Questa finamira duai vegnir cuntanschida cun mesiras ch'èn socialmain cumpatiblas en Svizra ed a l'exteriur. L'iniziativa fixescha in termin da 10 onns. A partir da lura na dastga la grevezza per l'ambient che vegn chaschunada tras il consum en Svizra, betg pli surpassar las limitas dal planet en proporziun cun la cumpart da la Svizra a la populaziun mundiala. Il text da l'iniziativa na prescriva betg concretamain las mesiras da realisaziun sco prescripziuns, scumonds ed impuls per in consum pli ecologic. Pervia dal curt termin vegni probablamain a duvrar instruments radicals.
Dumonda da votaziun
Vulais Vus acceptar l'iniziativa dal pievel «Per in'economia responsabla entaifer las limitas dal planet (Iniziativa da responsabladad per l'ambient)» ?
Recumandaziun dal Cussegl federal e dal parlament: na
Il Cussegl federal ed il parlament refusan l'iniziativa. Ella ha per consequenza bleras novas prescripziuns e blers novs scumonds che restrenschan fermamain il consum, ch'indebleschan l'economia e che augmentan il pretsch da blers products. Il Cussegl federal ed il parlament vulan perquai cuntinuar cun la politica da l'ambient actuala.
Recumandaziun dal comité d'iniziativa: gea
Tenor il comité pretenda l'Iniziativa da responsabladad per l'ambient quai che duess esser evident: mantegnair la basa da viver dals umans. Tuts han in dretg sin mangiativas saunas, sin aua da baiver netta e sin bun'aria. L'iniziativa serva al bainstar ed a la sanadad dals umans.
Explicaziuns dal Cussegl federal: admin.ch