Votaziun dal pievel dals 30 november 2025

Oz èn ils umens svizzers obligads da prestar in servetsch en l'armada u en la protecziun civila. Ils umens ch'èn obligads da far servetsch militar, ma che han conflicts da conscienza, prestan in servetsch civil pli lung. Tgi che na presta nagin servetsch, sto pajar ina taxa da cumpensaziun. La pli gronda part dals dis da servetsch che vegnan prestads oz, sa referescha directamain a la segirezza da la Svizra. Per las dunnas svizras è il servetsch en l'armada u en il servetsch civil facultativ.

L'Iniziativa servetsch civic prescriva, che tut las burgaisas ed ils burgais svizzers ston prestar in servetsch a favur da la generalitad e da l'ambient. Cun il «service citoyen» (servetsch civic) vul l'iniziativa rinforzar il bainstar general. Perquai stues­san er las dunnas prestar da nov in servetsch. Quest servetsch duai vegnir prestà en il militar, en la protecziun civila u en furma d'in servetsch da milissa equivalent. L'effectiv reglamen­tar da l'armada e da la protecziun civila sto dentant esser garantì. L'iniziativa vul cuntanscher ina chapientscha pli vasta da la segirezza ed orientar l'obligaziun da far servetsch pli fitg a secturs sco la protecziun dal clima, la segirezza alimentara e l'assistenza. Tgi che na presta nagin servetsch, duai pajar sco oz ina taxa. Tras l'introducziun d'ina obligaziun generala da far servetsch vegnissan recrutadas duas giadas uschè bleras bur­gaisas e burgais sco oz. Uschia s'augmentassan correspunden­tamain er ils custs per la Confederaziun, ils chantuns e l'economia.

Vulais Vus acceptar l'iniziativa dal pievel «Per ina Svizra che s'engascha (Iniziativa servetsch civic)»?

L'armada e la protecziun civila èn – cun il sustegn dal servetsch civil – pitgas centralas per la segirezza da la Svizra. In'obligaziun da far servetsch dovri mo per questas organisaziuns. Cun il servetsch civic va l'iniziativa bler pli lunsch. Per la Confederaziun ed ils chantuns resultassan gronds custs, ed er l'economia vegniss engrevgiada fermamain.

Per il comité rinforzass in «servetsch civic» il sistem da milissa, promovess la coesiun sociala e gidass a dumagnar la midada dal clima. Uschia vul l'iniziativa contribuir ch'ins chape­scha sut segirezza pli e pli savens er secturs ordaifer l'armada e la protecziun civila.

La Svizra sto reducir sias emissiuns da gas cun effect da serra fin l'onn 2050 a netto nulla. Quai ha il pievel decidì. Per mesiras che gidan a cuntanscher questa finamira stattan a disposiziun oz a la Confederaziun var 2 milliardas per onn. Quests meds finanzials derivan en emprima lingia da taxas dependentas dal consum, che vegnan incassadas sin carburants, combustibels ed electricitad.

L'iniziativa pretenda dapli meds finanzials per la politica dal clima. Ils daners duain resultar d'ina taglia federala sin iertas e sin donaziuns. Ina tala taglia enconuschan ins fin ussa mo sin plaun chantunal e communal. Da nov duai la Confedera­ziun incassar supplementarmain ina taglia da 50 pertschient sin l'ierta e sin las donaziuns d'ina persuna. Ils emprims 50 milliuns francs duain dentant esser libers da questa taglia. La Confede­raziun duai survegnir dus terzs da las entradas, ils chantuns in terz. Tenor il text da l'iniziativa ston las entradas da la nova taglia sin iertas e sin donaziuns vegnir duvradas «per cumbat­ter en moda socialmain gista la crisa dal clima sco er per per­metter a l'entira economia la transfurmaziun ch'è necessaria per quest intent».

Vulais Vus acceptar l'iniziativa dal pievel «Per ina politica dal clima sociala finan­ziada en moda fiscalmain gista (Iniziativa per l'avegnir)»?

Tenor il Cussegl federal ed il parlament è l'iniziativa la faussa via per cuntanscher las finamiras dal clima da la Svizra. Ultra da quai pudess la realisaziun da l'iniziativa esser in motiv per persunas bainstantas e per interpresas da bandunar la Svizra. Quai pudess periclitar plazzas da lavur ed – empè d'augmentar las entradas fiscalas – perfin reducir talas en cumparegliaziun cun oz.

Per il comité d'iniziativa na va la politica dal clima actuala betg lunsch avunda. Per cumbatter la crisa dal clima dovria quai dapli meds finanzials. Tgi che ristgia las basas da viver natiralas per ses profits, duaja star bun per quai. Ina taglia per l'avegnir da 50 pertschient sin iertas e sin donaziuns da pli che 50 milliuns francs saja socialmain gista.