Resultats davart la votaziun: admin.ch.
Curtamain
L'assicuranza per vegls e survivents (AVS) è il fundament dal provediment da vegliadetgna en Svizra. Passa 2,5 milliuns persunas pensiunadas survegnan actualmain ina renta da la AVS. La renta da la AVS duai cuvrir commensuradamain il basegn d'existenza en la vegliadetgna. La gronda part da las persunas pensiunadas ha anc ulteriuras entradas, en spezial ina renta da la cassa da pensiun. Tgi che na vegn betg da cuvrir ses custs da viver uschia, ha il dretg sin prestaziuns supplementaras (PS).
L'iniziativa vul auzar las rentas da vegliadetgna da la AVS per ina renta mensila. Ultra da las 12 rentas mensilas vegniss pajada mintga onn ina 13avla renta. L'iniziativa prescriva er, che las prestaziuns supplementaras na dastgan betg vegnir reducidas pervia da la 13avla renta. La renta da vegliadetgna annuala maximala da persunas singulas s'augmentass per 2450 sin 31 850 francs, quella da conjugals per 3675 sin 47 775 francs. Tras quest augment importassan ils custs per la 13avla renta da la AVS – il mument da l'introducziun – previsiblamain var 4,1 milliardas francs; da questa summa stuess la Confederaziun surpigliar circa 800 milliuns francs. Suenter dessi svelt in ulteriur augment dals custs. L'iniziativa na respunda betg la dumonda da la finanziaziun. Grazia a differentas refurmas han las prestaziuns da la AVS oz ina buna basa finanziala; suenter l'onn 2030 èsi dentant da far quint cun deficits – er senza ina 13avla renta da la AVS. Sche la 13avla renta vegniss introducida, stuess la AVS avair entradas supplementaras ubain reducir las prestaziuns.
Recumandaziun dal Cussegl federal e dal parlament: na
Il Cussegl federal ed il parlament na vesan nagina libertad finanziala per ina 13avla renta da la AVS. Stabilisar la AVS e segirar las rentas han prioritad. La gronda part da las persunas pensiunadas n'è betg dependenta d'ina 13avla renta da la AVS. E persunas cun paucs meds finanzials survegnan prestaziuns
supplementaras.
supplementaras.
Recumandaziun dal comité d'iniziativa: gea
Per il comité d'iniziativa dovri ina 13avla renta da la AVS, perquai che la renta tanscha per adina damain. Ils tschains da locaziun, las premias da las cassas da malsauns e las victualias: tut vegnia pli char. Adina dapli persunas pensiunadas hajan fadia da sa tegnair sur l'aua. Tenor il comité sajan ils meds per finanziar la 13avla renta da la AVS avant maun.
Curtamain
Per ils proxims onns è la finanziaziun da las rentas da la AVS garantida, quai cunzunt grazia a las duas refurmas dals ultims 5 onns. Per exempel han ins auzà las contribuziuns dals salaris e la taglia sin la plivalur. Ultra da quai vegn la vegliadetgna da pensiun da las dunnas auzada sin 65 onns. Cun questa cumbinaziun d'entradas pli autas e d'expensas pli bassas èn las finanzas da la AVS stabilisadas fin circa l'onn 2030. A media vista è la AVS dentant confruntada cun grondas sfidas finanzialas. Per l'ina s'augmenta il dumber da las persunas pensiunadas pli svelt ch'il dumber da las persunas cun activitad da gudogn che pajan contribuziuns a la AVS. Per l'autra ston las rentas vegnir pajadas pli ditg, perquai che l'aspectativa da vita crescha.
L'Iniziativa da rentas vul segirar duraivlamain la finanziaziun da la AVS cun auzar la vegliadetgna da pensiun. Ella pretenda d'auzar sco emprim la vegliadetgna da pensiun da las dunnas e dals umens pass per pass sin 66 onns fin l'onn 2033. Suenter duai la vegliadetgna da pensiun vegnir liada a l'aspectativa da vita media: Sche l'aspectativa da vita crescha, vegniss la vegliadetgna da pensiun auzada automaticamain – però betg in ad in, mabain mo per 80 pertschient da l'aspectativa da vita creschida ed en pass da maximalmain 2 mais per onn. Sche l'iniziativa vegn acceptada, distgargiass quai la AVS: Cun auzar la vegliadetgna da pensiun sin 66 onns vegnissan las expensas da la AVS previsiblamain reducidas per var 2 milliardas francs. L'adattaziun automatica da la vegliadetgna da pensiun a l'aspectativa da vita creschenta distgargiass supplementarmain la AVS.
Recumandaziun dal Cussegl federal e dal parlament: na
Cun l'iniziativa vegniss la vegliadetgna da pensiun fixada en il futur sulettamain tras ina furmla matematica. In tal automatissem è memia pauc flexibel per il Cussegl federal ed il parlament. Per fixar la vegliadetgna da pensiun ston adina vegnir resguardads differents aspects, per exempel il svilup da l'economia e dal martgà da lavur.
Recumandaziun dal comité d'iniziativa: gea
Per il comité d'iniziativa èsi cler: La AVS è en ina crisa finanziala – sche nus na faschain nagut, èn las rentas en privel. L'Iniziativa da rentas mitigeschia quest privel, senza ch'i dovria reducziuns da las rentas, taglias supplementaras u novs debits. Ella saja la soluziun optimala, moderada, sociala e gista per
tut las generaziuns.
tut las generaziuns.
Sin admin.ch, la pagina d'internet uffiziala dal Cussegl federal, e sin l'app VoteInfo, chattais Vus infurmaziuns e links davart ils temas dals projects da votaziun.