Las autoritads svizras online

directamain tar il cuntegn

Ina via da scola segira – a pe, cun il velo u cun il bus

Attenziun al cumenzament da la scola! Circa uschia hai num mintgamai l'avust, cur che millis d'uffants van – forsa per l'emprima giada – lur via da scola. Dad ir mintgadi questa via pretenda blera attenziun dad els e dals ulteriurs participants da traffic. Ensemen cun las autoritads e cun la polizia renda il post da consultaziun svizzer per la prevenziun d'accidents (ppa) attent als scolarets cun placats.

Tips per il cumportament en il traffic sin via per scolaras e scolars, per geniturs, per automobilistas ed automobilists

Responsabladad per la via da scola

La responsabladad per la via da scola portan ils geniturs. Els decidan, co che lur uffant arriva a scola: a pe, cun il velo u cun il bus. Las vischnancas prendan mesiras mo, sche la via da scola è insupportabla. Ina via da scola è insupportabla e na po perquai betg vegnir pretendida dals uffants, sch'ella è per exempel memia lunga u sch'ella cuntegna parts privlusas. Las autoritads da scola decidan, sch'ina via da scola è supportabla per ils uffants e surpiglian eventualmain ils custs per la meglierar.

Pedibus – mes pes èn il bus da scola

En differents lieus da la Svizra èn geniturs s'unids a cuminanzas pedibus. Accumpagnada d’ina persuna creschida sa renda ina gruppa d'uffants sin la via da scola. Sco in bus va pedibus a prender ils uffants a la fermada da pedibus signalisada ed als maina suenter la scola puspè enavos. Il pedibus è adattà per uffants che n'èn anc betg vegls avunda e che n'han anc betg la cumpetenza dad ir sulets a scola.