Surpassaments da sveltezza

Manischà memia svelt?

Multa u accusaziun

Sche Vus surpassais la sveltezza maximala admessa, stuais Vus quintar cun las suandantas multas (en francs) resp. cun ina accusaziun:

Surpassament	Entaifer in vitg	Ordaifer in vitg	Autostrada
per 1-5 km/h	40.-	40.-	20.-
per 6-10 km/h	120.-	100.-	60.-
per 11-15 km/h	250.-	160.-	120.-
per 16-20 km/h	Anzeige	240.-	180.-
per 21-25 km/h	accusaziun	accusaziun	260.-
sur 25 km/h	accusaziun	accusaziun	accusaziun

* Da la sveltezza mesirada vegn deducida in’uschenumnada reducziun da segirtad. Sch’ina mesiraziun da laser inditgescha per exempel ina sveltezza dad 87 km/h, deduceschan ils controlladers 3 km/h e partan dal fatg, che Vus eras en viadi cun 84 km/h. L’autezza da la deducziun da segirtad dependa dal gener da la mesiraziun e da la sveltezza.

Suenter ina accusaziun pajais Vus per regla in chasti d’almain 400 francs. En cas d’in grond surpassament, poi vegnir bler pli char: la multa dependa alura er da Vossa situaziun finanziala. Tut tenor stuais Vus pajar ultra da quai custs da procedura e taxas.

Retratga dal permiss da manischar

Suenter ina accusaziun As po ultra da quai vegnir prendì davent il permiss da manischar. La tabella inditgescha las mesiras pussaivlas en cas d’in cler surpassament da la sveltezza:

Entaifer in vitg	surpassament per 16-20 km/h	avertiment
	surpassament per 21-24 km/h	retratga dal permiss da manischar per 1 mais (almain)
	surpassament per 25 km/h e dapli	retratga dal permiss da manischar per 3 mais (almain)
Ordaifer in vitg	surpassament per 21-25 km/h	avertiment
	surpassament per 26-29 km/h	retratga dal permiss da manischar per 1 mais (almain)
	surpassament per 30 km/h e dapli	retratga dal permiss da manischar per 3 mais (almain)
Autostrada	surpassament per 26-30 km/h	avertiment
	surpassament per 31-34 km/h	retratga dal permiss da manischar per 1 mais (almain)
	surpassament per 35 km/h e dapli	retratga dal permiss da manischar per 3 mais (almain)

In avertiment è ina carta melna. Sche Vus surpassais aifer dus onns anc ina giada la sveltezza, stuais Vus dar giu il permiss da manischar.

Sche Vus avais surpassà la sveltezza gia pliras giadas, stuais Vus probablamain dar giu il permiss da manischar per bler pli ditg.

Sche Vus avais manischà memia svelt a moda privlusa, As po la polizia prender davent il permiss da manischar immediatamain. Ultra da quai stuais Vus far in test psicologic da traffic per examinar Vossa abilitad da manischar.

Delicts da manischar bler memia svelt

Tgi che va bler memia svelt cun auto ristga da metter en privel cun quest cumportament la vita d’autras persunas. Manischar bler memia svelt vul dir il suandant:

in surpassament d’almain 40 km/h entaifer ils lieus;
in surpassament d’almain 60 km/h ordaifer ils lieus;
in surpassament d’almain 80 km/h sin l’autostrada.

Manischunzas e manischunzs che van bler memia svelt vegnan chastiadas u chastiads cun ina multa fitg auta e cun in chasti da detenziun dad in fin quatter onns. Vus stuais dar giu il permiss da manischar per almain dus onns e survegnis enavos el mo cun in’expertisa psicologica da traffic. Voss auto po vegnir confiscà e vendì u vegnir demolì

Tschertga

Surpassaments da sveltezza