Organisar la midada, s'occupar da las assicuranzas, chattar ina lavur, annunziar ils uffants per la scola, s'annunziar sco persuna dischoccupada, dumandar agid finanzial: returnar en Svizra pretenda ina buna organisaziun.
Per As gidar a planisar Voss return en Svizra, dat il mussavia dal Departament federal dals affars exteriurs differents tips.
Per Voss return en Svizra pudais Vus er consultar las infurmaziuns da SwissCommunity, l'Organisaziun da las Svizras e dals Svizzers a l'exteriur.
Planisais Vus da returnar en Svizra suenter in lung segiurn a l'exteriur? La plipart da Voss bains pudais Vus dischlocar senza stuair pajar taxas a la duana. Sin ch.ch chattais Vus ina survista da las formalitads per sa chasar en Svizra.
Sin la pagina d'internet da l'Uffizi federal da la duana e da la segirezza dals cunfins chattais Vus las respostas a las dumondas las pli frequentas davart ina midada da chasa.
L'Organisaziun da las Svizras e dals Svizzers a l'exteriur metta a disposiziun ina glista da differentas plattafurmas da plazzas, d'agenturas d'intermediaziun da lavur e d'agenturas da lavur temporara. Infurmaziuns davart la tschertga da lavur en Svizra.
Na savais Vus betg, sche Vus avais il dretg d'ina indemnisaziun da dischoccupaziun, cura che Vus returnais en Svizra? En la rubrica «dischoccupaziun ed agid social» As declera il Departament federal dals affars exteriurs, tge premissas che Vus stuais ademplir.
La plattafurma arbeit.swiss dal Secretariat da stadi per l'economia As permetta da tschertgar ina lavur, da dumandar ina indemnisaziun da dischoccupaziun u d'As laschar cussegliar davart la tschertga da lavur. Sche Vus vulais As annunziar sco persuna dischoccupada, pudais Vus far quai online u tar il center regiunal per intermediaziun da lavur (CIL) da Vossa nova vischnanca da domicil.
As annunziai uschè svelt sco pussaivel, sche Vus essas dischoccupada u dischoccupà, per ch'il CIL As possia gidar a tschertgar ina lavur.
Mussavia dal DFAE per planisar Voss return en Svizra
Mussavia per returnar en Svizra da l'Organisaziun da las Svizras e dals Svizzers a l'exteriur SwissCommunity
Infurmaziuns sin ch.ch davart il tema «Vegnir a star en Svizra»
Mintga persuna che abita en Svizra sto far in contract cun ina cassa da malsauns. Sin ch.ch vegnis Vus a savair, co che quai funcziuna.