Infurmaziuns davart il pajais da destinaziun
Il Departament federal d'affars exteriurs (DFAE) metta a disposiziun dossiers davart il tema «Viver e lavurar a l'exteriur» cun infurmaziuns utilas davart ils pajais da destinaziun ils pli impurtants. Quests dossiers infurmeschan tranter auter davart il martgà da lavur, las assicuranzas, las pussaivladads d'abitar ed il sistem da scola en Voss pajais ospitant.
Chaussas administrativas
Vus pudais duvrar la glista dal DFAE davart las formalitads da l'emigraziun: obligaziuns d'annunzia, formalitads a la duana, bancas svizras a l'exteriur, segirezza sociala, permiss da manischar e.u.v.
Er l'organisaziun da Svizras e Svizzers a l'exteriur SwissCommunity orientescha davart temas che pertutgan la vita a l'exteriur: dretg da burgais svizzer, servetsch militar, agid a l'exteriur, uniuns svizras, finanzas e provediment e.u.v.
Persunas che van a star a l'exteriur n'èn betg pli obligadas d'avair in'assicuranza da malsauns svizra. Tschertas gruppas da persunas ston dentant restar assicuradas en Svizra – autras dastgan salvar lur assicuranza da malsauns en Svizra. Las cundiziuns dependan er dal pajais da destinaziun.
Sche Vus emigrais en la UE/AECL
Per regla stuais Vus far in'assicuranza da malsauns en quel stadi da la UE/AECL, nua che Vus lavurais. Quai na vala betg per persunas pensiunadas, per cunfinarias e cunfinaris, per lavurantas e lavurants tramess en in pajais u per persunas che retiran ina indemnisaziun da dischoccupaziun en Svizra.
Sin la pagina d'internet da l'organisaziun da Svizras e Svizzers a l'exteriur SwissCommunity chattais Vus explicaziuns detagliadas davart l'assicuranza da malsauns en la UE/AECL per las differentas categorias da persunas.
Sche Vus emigrais en in pajais ordaifer la UE/AECL
Sche Vus emigrais en in pajais ordaifer la UE/AECL, na pudais Vus betg pli salvar Vossa assicuranza da basa en Svizra. In'excepziun vala per lavurantas e lavurants tramess en in pajais. En tut ils auters cas datti pliras pussaivladads per restar assicurà:
Vus pudais supplitgar Voss assicurader da far in contract privat per salvar Vossa protecziun tras l'assicuranza.
Vus pudais tschertgar ina soluziun cun in'assicuranza en Voss pajais da dimora futur.
Tschertas assicuranzas porschan soluziuns internaziunalas. Consultai la glista da las soluziuns internaziunalas da l'organisaziun da Svizras e Svizzers a l'exteriur SwissCommunity.
Lavurantas e lavurants tramess en in pajais
L'Uffizi federal da sanadad publica (UFSP) declera las differentas prescripziuns davart l'assicuranza da malsauns tut tenor il pajais, en il qual Vus vegnis tramessa u tramess.
Persunas che retiran ina renta svizra
Il UFSP dat infurmaziuns davart l'assicuranza da malsauns per persunas che retiran ina renta svizra a l'exteriur.
Sche Vus giais a star a l'exteriur, èsi impurtant d'As annunziar tar ina represchentanza svizra a l'exteriur (ambassada u consulat). Quai facilitescha d'entrar en contact en cas d'urgenza e pussibilitescha da retrair documents (maridaglia, naschientscha, mortori) sco er da salvar il dretg da votar en Svizra.
L'adressa da Vossa represchentanza svizra chattais Vus sin la pagina d'internet dal DFAE.
Vus pudais er far diever dal spurtegl online dal EDA per Svizras e Svizzers a l'exteriur.
Las Svizras ed ils Svizzers a l'exteriur pon sa participar a las votaziuns federalas sco er a las elecziuns dal Cussegl naziunal. En intgins chantuns èsi er pussaivel da sa participar a las votaziuns chantunalas.
Il DFAE dat infurmaziuns davart la pensiun a l'exteriur.
Il UFSP dat scleriments davart l'assicuranza da malsauns per persunas che retiran ina renta svizra a l'exteriur.
Infurmaziuns dal DFAE davart l'emigraziun
Infurmaziuns da SwissCommunity davart la vita a l'exteriur
Servetschs che la Svizra po porscher a burgaisas e burgais svizzers che sa trategnan u lavuran a l'exteriur
Infurmaziuns da la AVS/AI davart quest tema
Infurmaziuns davart la lavur a l'exteriur e davart la purschida per Svizras e Svizzers a l'exteriur sin ch.ch