Cun il permiss per emprender a manischar pudais Vus manischar cun ina persuna accumpagnanta. En quest connex stuais Vus resguardar in pèr chaussas.

• per autos (categoria B) è il permiss per emprender a manischar valaivel 24 mais e per motos (categoria A) 4 mais.

• Voss permiss per emprender a manischar vala sulettamain en Svizra. Viadis d’emprender a manischar a l’exteriur n’èn betg recumandads per motivs d’assicuranza.

• sco persuna accumpagnanta stuais Vus avair almain 23 onns, avair passà l’examen da manischar avant almain 3 onns ed avair il permiss definitiv da manischar.

• durant il viadi stuais Vus guardar che la segirezza vegnia garantida e che las reglas da traffic vegnian resguardadas.

• Vus stuais pudair cuntanscher ed utilisar il frain da maun senza problems.

• sco persuna accumpagnanta stais Vus buna per surpassaments, sche Vus na resguardais betg Vossas obligaziuns. La scolara u il scolar da manischar è responsabla u responsabel per cuntravenziuns ch’ella u el avess pudì evitar sin basa da sia abilitad da manischar.

• sin la vart davos da l’auto stuais Vus fixar a moda bain visibla ina tavla blaua cun in «L» alv. La tavla stuais Vus allontanar sch’i na sa tracta betg d’in viadi d’emprender a manischar.

• per viadis d’emprender a manischar dastgais Vus utilisar mo vehichels a motor, per ils quals i dat ina assicuranza da responsabladad.

• ni Vus ni Vossa persuna accumpagnanta dastgais baiver alcohol avant in viadi d’emprender a manischar (a partir da 0,1 promils As rendais Vus chastiabla u chastiabel).

• tar viadis d’emprender a manischar dastgan auters passagiers esser preschents.

L’instrucziun da traffic è obligatorica. Ella dura 8 uras e po esser repartida sin dus fin quatter dis. Ella vegn purschida d’autoscolas e da scolastas e scolasts d’ir cun auto.

Vus duvrais in permiss valaivel per emprender a manischar per pudair frequentar l’instrucziun da traffic.

Per l’examen pratic d’ir cun auto As pudais Vus pir annunziar, cura che Vus avais frequentà l’instrucziun da traffic. Excepziun: Sche Vus possedais gia in permiss da manischar da la categoria A, A1 u B1, na stuais Vus betg pli frequentar l’instrucziun da traffic.

Vus stuais avair cumplenì almain 18 onns per pudair absolver l’examen pratic d’ir cun auto. Ina experta u in expert giuditgescha, sche Vus manischais a moda segira e resguardais las reglas da traffic. Vossa scolasta u Voss scolast d’ir cun auto po giuditgar il meglier, sche Vus essas capabla u capabel da passar l’examen. Senza instrucziun professiunala na vegnis Vus strusch da passar l’examen.

Vus As pudais annunziar per l’examen d’ir cun auto tar l’uffizi per il traffic sin via da Voss chantun da domicil.

L’examen pratic d’ir cun auto stuais Vus absolver en in vehichel da la categoria da vehichels correspundenta.

A l’examen stuais Vus prender cun Vus ils suandants documents:

• in document d’identitad valaivel (passaport, carta d’identitad u document da legitimaziun da persunas estras)

• Voss permiss per emprender a manischar

• Voss permiss da manischar, en cas che Vus dastgais manischar vehichels d’autras categorias

• il document dal vehichel per il vehichel d’examen.

Sche Vus avais dumagnà l’examen d’ir cun auto, survegnis Vus il permiss da manischar a prova cun la posta.

Sche Vus na dumagnais betg l’examen l’emprima giada, pudais Vus per regla repeter quel suenter in mais.

Dubla nunreussida

Sche Vus na dumagnais per la segunda giada betg l’examen d’ir cun auto, stuais Vus mussar in attest d’ina scolasta admessa u d’in scolast admess d’ir cun auto per As pudair annunziar ina terza giada. Quest attest sto confermar che Vus avais terminà Vossa scolaziun d’ir cun auto.

Tripla nunreussida

Sche Vus na dumagnais per la terza giada betg l’examen pratic d’ir cun auto, stuais Vus far in examen d’abilitad da manischar. Pir alura pudais Vus far l’examen ina quarta giada. Sche Vus na dumagnais betg quest test, daventa Voss permiss d’emprender a manischar nunvalaivel. Alura stuais Vus far in’expertisa psicologica da traffic. Questa expertisa sto esser positiva per che Vus possias As annunziar ina quarta giada per l’examen d’ir cun auto.

Quadrupla nunreussida

Per cas che Vus na dumagnais per la quarta giada betg l’examen d’ir cun auto, pudais Vus mo repeter in’ulteriura giada l’examen, sche Vus faschais in’expertisa psicologica da traffic e sche quella è positiva.

Sche Vus acquistais per l’emprima giada in permiss da manischar da la categoria A (motos) u da la categoria B (auto), survegnis Vus sco emprim in permiss da manischar a prova.

Il temp da prova dura trais onns. Per cas che Vus stuessas dar giu il permiss da manischar pervia d’in surpassament, vegn il temp da prova prolungà per in onn.

Durant il temp da prova stuais Vus frequentar in curs da perfecziunament che dura in di. Suenter che Vus avais survegnì il permiss da manischar a prova, stuais Vus frequentar l’uschenumnà curs da perfecziunament aifer dudesch mais.

Sch’il temp da prova è scadì e sche Vus avais frequentà il curs da perfecziunament, pudais Vus dumandar il permiss definitiv da manischar. Vus na stuais far pli nagins examens.

Quant ch’i custa exactamain d’emetter il permiss da manischar dependa da Voss chantun da domicil, dal dumber da lecziuns e dal dumber da provas d’examen che Vus duvrais. Vus stuais calcular cun ils suandants custs:

• examen da la vesida: 10 fin 15 francs

• curs d’agid d’urgenza: 100 fin 200 francs

• cudesch da teoria (betg obligatoric): circa 30 francs

• examen da teoria: 30 fin 40 francs

• permiss per emprender a manischar: 20 fin 80 francs

•  instrucziun da traffic: 200 fin 280 francs

• lecziun da manischar (betg obligatoric, 45-50 min.): 80 fin 110 francs per lecziun

• examen pratic da manischar: 120 fin 140 francs

• curs da perfecziunament: 340 fin 510 francs

• permiss da manischar a prova: 30 fin 60 francs

• permiss definitiv da manischar: 15 fin 70 francs

• Nothilfekurs: 100 bis 200 Franken

• Theoriebuch (nicht obligatorisch): ca. 30 Franken

• Theorieprüfung: 30 bis 40 Franken

• Lernfahrausweis 20 bis 80 Franken

• Verkehrskundeunterricht: 200 bis 280 Franken

• Fahrschullektion (nicht obligatorisch, 45- 50 Min.): 80 bis 110 Franken pro Lektion

• Praktische Führerprüfung: 120 bis 140 Franken

• WAB-Kurs: 340 bis 510 Franken

• Führerausweis auf Probe: 30 bis 60 Franken

• Unbefristeter Führerausweis: 15 bis 70 Franken

Ils uffizis per il traffic sin via:

L’Uffizi per il traffic sin via da Voss chantun da domicil