Voss permiss da manischar è ì a perder
Sche Voss permiss da manischar è ì a perder u è vegnì engulà, stuais Vus laschar emetter in nov.
Ina indicaziun n’è betg pli valaivla
Sch’ina indicaziun sin Voss permiss da manischar n’è betg pli valaivla, duvrais Vus in nov permiss. Pensai a quai, sche Vus midais per exempel Voss num u desistis d'ina categoria da permiss.
En cas che Vus avais anc in permiss da manischar blau da palpiri, stuais Vus medemamain dumandar in nov permiss, sche Vus midais adressa. Per il permiss da manischar en il format da carta da credit n’è quai betg necessari. Ulteriuras infurmaziuns survegnis Vus da Voss uffizi chantunal per il traffic sin via.
Vus avais in permiss da manischar blau da palpiri
Il permiss da manischar da palpiri n'è betg pli valaivel suenter ils 31 da schaner 2024. En cas che Vus avais anc in tal, al stuais Vus barattar il pli tard fin questa data cun in permiss en il format da carta da credit.
En tscherts pajais duvrais Vus in permiss da manischar internaziunal.
En cas che Voss permiss da manischar è vegnì engulà, stuais Vus annunziar l’enguladitsch ad in post da polizia.
As drizzai alura a Voss uffizi per il traffic sin via. Quel emetta in duplicat, cun il qual Vus dastgais charrar, fin che Vus retschavais il nov
Uschespert ch’in nov permiss è emess, n’è il vegl betg pli valaivel. En cas che Vus chattais puspè il permiss pers u engulà, al tramettai cun ina curta explicaziun a l'uffizi per il traffic sin via.
As drizzai a l’uffizi per il traffic sin via da Voss chantun da domicil. Il permiss As vegn tramess per posta entaifer ina fin duas emnas.
Ils custs per barattar il permiss varieschan da chantun a chantun.
Quintai cun ina summa da duas cifras per in duplicat u per in’actualisaziun. Per barattar in permiss da manischar da l’exteriur importan ils custs probablamain sur 100 francs.
En cas che Vus stais en Svizra, dastgais Vus charrar mo durant dudesch mais cun in permiss da manischar da l’exteriur. Suenter al stuais Vus barattar cun in permiss da manischar svizzer. In barat è er anc pussaivel suenter quest termin, dentant po quai dar ina multa.
Barattar il permiss da manischar da l’exteriur
Las proceduras da barat varieschan tut tenor il pajais che ha emess il permiss da manischar da l’exteriur. En quest cas stuais Vus mussar il permiss da manischar original e reussir in examen da la vesida.
Sche Vus possedais in permiss da manischar d'in pajais da l'Uniun europeica u dal Spazi economic europeic (Islanda, Liechtenstein, Norvegia), survegnis Vus il permiss da manischar svizzer senza examinaziun supplementara da Vossa qualificaziun da manischar. Voss permiss da manischar da l’exteriur vegn tramess enavos a l’uffizi emettent.
Per barattar in permiss da manischar ch’è vegnì emess en in auter pajais, stuais Vus cumprovar Vossa qualificaziun da manischar cun ils suandants examens:
in examen da manischunza u manischunz (viadi da controlla)
in examen da teoria supplementar (per manischunzas e manischunzs da vehichels professiunals)
En cas d'in barat survegnis Vus in permiss da manischar svizzer per trais onns sin emprova u in permiss senza data da scadenza. Il permiss As vegn tramess per posta. La durada da la consegna variescha da chantun a chantun.
Per ulteriuras infurmaziuns davart Voss cas As drizzai a Voss uffizi chantunal per il traffic sin via.
Ulteriuras infurmaziuns da ch.ch sin la pagina Permiss da manischar internaziunal.