La carta dal di da spargn communala è in bigliet ch'è valaivel il di tschernì fin las 5 dal di suandant sin tut ils trajects dal champ d’applicaziun da l’abunament general. Sin quests trajects permetta ella pia in dumber illimità da viadis cun il bus, cun il tram, cun il tren e per part er cun la bartga.
La carta dal di da spargn è persunala e na po pia betg vegnir dada vinavant ad in'autra persuna. En cas d'ina perdita po ella vegnir restampada.
Betg tut las vischnancas na porschan la pussaivladad da cumprar ina carta dal di da spargn. Plinavant è il dumber da cartas dal di da spargn limità a livel naziunal per mintga di. Sin spartageskarte-gemeinde.ch vesais Vus, nua ch’ellas e quantas ch’èn disponiblas.
Il pretsch da la carta dal di da spargn dependa da la data da cumpra e la data da viadi: pli baud che Vus la cumprais e dapli che Vus pudais spargnar. Ils pretschs èn differents tut tenor classa e possess da la mesa taxa. Vus pudais cumprar la carta a partir da 6 mais ordavant e fin in di avant il viadi.
Sin la pagina d'internet spartageskarte-gemeinde.ch chattais Vus infurmaziuns utilas davart la carta dal di da spargn communala, p.ex. la disponibladad, ils pretschs actuals, ils posts da vendita e las cundiziuns.
Sin la pagina d'internet da las VFF chattais Vus il champ d’applicaziun da l’abunament general, nua che l’abunament general e consequentamain er Vossa carta dal di da spargn communala è valaivla.