Duas categorias dad e-bikes
Cun e-bikes u cun velos electrics ston ins ir sin vias e sin vials da velo. I dat duas categorias:
e-bikes plauns (assistenza dal pedal fin 25 km/h)
e-bikes svelts (assistenza dal pedal fin 45 km/h)
E-bikes svelts valan sco velo a motor (moped). Vehichels a duas rodas cun ina prestaziun dal motor da passa 1000 watts u cun ina sveltezza maximala da pli che 45 km/h tutgan tar la categoria «moto».
Vegliadetgna minimala e permiss da manischar
Giuvenils dastgan ir cun e-bikes a partir da 14 onns. Els dovran per quest intent il permiss da manischar da la categoria M (velos a motor).
A partir da 16 onns na dovri per e-bikes plauns nagin permiss da manischar.
Per e-bikes svelts dovran tuts in permiss da manischar – pia er persunas creschidas (almain categoria M).
Equipament dad e-bike
Per che Vus dastgas ir cun Voss e-bike sin via, dovra quel:
Pneus pumpads
Dus ferms frains – in per la roda davant e l'auter per la roda davos
In reflectur drizzà enavos
In scalin.
Per e-bikes svelts dovri plinavant:
In spievel davos
In numer d'immatriculaziun mellen (ed uschia in document dal vehichel).
E-bikes plauns fin 25 km/h
E-bikes plauns n'han nagin numer d'immatriculaziun. (La responsabladad tar in accident è savens cuntegnida en l'assicuranza privata da responsabladad – dumandai Vossa assicuranza).
Vus na stuais betg purtar ina chapellina, ma quai è recumandà.
Vus dastgais ir sin vias ch'èn permessas per velos e scumandadas per velos a motor.
Vus dastgais er ir sur surfatschas da peduns ch'èn marcadas cun «velo permess».
E-bikes svelts fin 45 km/h
E-bikes svelts dovran in numer d'immatriculaziun ed ina vignetta dad e-bike che vus stuais actualisar annualmain. Vus survegnis quels directamain da Voss negozi spezialisà. Uschiglio As drizzai per plaschair a l'Uffizi per il traffic sin via da Voss chantun.
Vus stuais purtar ina chapellina.
Sin vias ch'èn scumandadas per velos a motor, dastgais Vus mo ir cun serrà giu il motor.
Surfatschas da peduns ch'èn marcadas cun «velo permess», dastgais Vus mo traversar cun serrà giu il motor.
A partir dal 1. d’avrigl 2024 ston tut ils velos electronics novs avair in tachometer. Per ils velos gia en circulaziun entra quest obligatori en vigur il 1. d’avrigl 2027.
Equipament da velo
Per che Vus dastgas ir cun Voss velo sin via, dovra quel:
Pneus pumpads
Dus ferms frains – in per la roda davant e l'auter per la roda davos
Duas glischs che traglischan en moda quieta – davant alv e davos cotschen
Dus reflecturs – davant alv e davos cotschen
Il scalin da velo n'è betg pli obligatoric.
Las reglas las pli impurtantas per ir cun il velo
Tar amplas cun glisch cotschna dastgan velos e velos a motor sviar a dretga, sch'ina tavla cun in velo mellen e cun ina frizza mussa quai. Las pedunas ed ils peduns sco er ils vehichels sin la via traversala han precedenza.
Uffants dastgan ir cun velo sin vias principalas avant il 6. onn da vegliadetgna cumplenì. Dentant mo sut surveglianza d'ina persuna d'almain 16 onns.
Uffants fin 12 onns dastgan duvrar il trottuar cun il velo – dentant mo, sche nagina via da velos u nagin vial da velo exista. Pedunas e peduns han precedenza.
Ni persunas creschidas ni uffants na ston purtar ina chapellina; ma quai è recumandà.
Vignetta da velo
La vignetta da velo è vegnida abolida l'onn 2012. La gronda part da las assicuranzas ha integrà la responsabladad en cas d'accidents da velo automaticamain en l'assicuranza privata da responsabladad. As infurmai tar Vossa assicuranza. Tgi che n'ha betg in'assicuranza da responsabladad, n'è betg pli assicurà cunter donns ch'ella u el chaschuna en cas d'accidents da velo envers terzas persunas. Tals donns pon esser fitg chars.
Sche Vus avais ulteriuras dumondas davart ir cun velo en Svizra, alura contactai per plaschair l'Uffizi per il traffic sin via da Voss chantun.
Tips dal UIAA per prevegnir accidents: Cun velo ed e-bike per via PPA
Perscripziuns per vehichels electrics da trend: Perscripziuns per vehichels electrics da trend