Autos, motos e chars annexs vegnan controllads regularmain. Sch'ina controlla tecnica tras la Controlla da vehichels a motor (CVM) è necessaria, survegnis Vus ina convocaziun en scrit da l'Uffizi chantunal per il traffic sin via.
Intervals da las controllas
La gronda part dals vehichels a motor vegn controllada en las suandantas distanzas:
Controlla per vehichels novs: suenter 5 onns
Controlla: 3 onns pli tard
Silsuenter: mintga 2 onns
Preparaziun
Per la controlla da vehichels a motor sto Voss vehichel esser tecnicamain irreproschabel e net. Reparaturas necessarias stuais Vus laschar far avant. Per regla vala la paina da laschar far in servetsch ad ina garaschista u in garaschist avant la controlla.
Custs
La controlla dal vehichel custa tut tenor il chantun different bler. Per l'examen d'ina moto u d'in auto stuais Vus far quint cun circa 60 francs. As infurmai per plaschair tar l'Uffizi per il traffic sin via da Voss chantun.
n vehichel po er vegnir controllà ordaifer quests intervals. Uschia duessas Vus a chaschun da la cumpra d'in auto d'occasiun resguardar, che quel saja vegnì controllà curt avant.
Sche Vus importais in vehichel d'occasiun, al laschai controllar, avant che Vus al guidais. Tar novs autos controlla l'Uffizi per il traffic sin via mo, sch'ils documents ed il vehichel correspundan; i na dat lura nagina controlla tecnica.
Sche Voss auto na dumogna betg la controlla, stuais Vus ir ad ina controlla posteriura. Normalmain è quella necessaria entaifer 30 dis e Vus stuais sezza u sez procurar per in termin per mussar Voss auto. En cas da pitschnas mancanzas basti en tscherts chantuns er, sch'ina garascha las eliminescha ed annunzia quai a l'Uffizi per il traffic sin via.
Ils Uffizis per il traffic sin via: