Il document dal vehichel e las tavlas dal numer pudais Vus dumandar tar l’Uffizi per il traffic sin via. Per quai duvrais Vus intgins documents.
Per in vehichel nov duvrais Vus
in’assicuranza da responsabladad e la cumprova correspundenta che Vus survegnis da Vossa assicuranza;
il rapport da controlla (formular 13.20A) che Vus survegnis da l’importader u da la duana – savens procura er Vossa garascha per quest;
in document d’identitad (ina carta d’identitad, in passaport u ina legitimaziun d’esters);
ina conferma da dimora u ina quittanza dals documents deponids sche Vus annunziais in vehichel per l’emprima giada. Quests documents survegnis Vus tar la Controlla d’abitants da Vossa vischnanca.
Per in vehichel d’occasiun duvrais Vus
in’assicuranza da responsabladad e la cumprova correspundenta che Vus survegnis da Vossa assicuranza;
il document dal vehichel da la possessura u dal possessur d’enfin ussa;
il rapport da controlla, en cas ch’ina controlla ha gì lieu (formular 13.20);
in document d’identitad (ina carta d’identitad, in passaport u ina legitimaziun d’esters);
ina conferma da dimora u ina quittanza dals documents deponids sche Vus annunziais in vehichel per l’emprima giada. Quests documents survegnis Vus tar l’autoritad d’abitants cumpetenta.
Per in vehichel da l’exteriur duvrais Vus
in’assicuranza da responsabladad e la cumprova correspundenta che Vus survegnis da Vossa assicuranza;
la conferma dal dazi;
la cumprova da l’admissiun da l’exteriur (p.ex. document dal vehichel da l’exteriur);
il rapport da controlla che Vus survegnis da la duana u da Vossa garascha (formular 13.20A);
in document d’identitad (ina carta d’identitad, in passaport u ina legitimaziun d’esters);
ina conferma da dimora u ina quittanza dals documents deponids sche Vus annunziais in vehichel per l’emprima giada. Quests documents survegnis Vus tar l’autoritad d’abitants cumpetenta.
Custs
Ils custs per l’immatriculaziun varieschan tut tenor chantun. Per il document dal vehichel e per las tavlas dal numer pajais Vus per regla tranter 50 e 100 francs. Per plaschair As infurmai tar l’Uffizi per il traffic sin via da Voss chantun da domicil.
Sche Vus avais plirs vehichels pudais Vus dumandar tavlas dal numer transferiblas. Uschia pudais Vus spargnar custs d’assicuranza e da la taglia dal traffic sin via. En quest cas pudais Vus dentant mintgamai mo esser cun in vehichel da viadi. Sche Vus vulais tavlas dal numer transferiblas, lura
ston ils vehichels esser da la medema categoria (Vus na pudais pia betg annunziar il medem numer per in auto e per ina moto),
ston ils vehichels avair la medema possessura u il medem possessur e
ston ils vehichels esser staziunads en il medem chantun.
Deponer las tavlas dal numer temporarmain
Sche Vus na duvrais betg Voss vehichel durant in tschert temp, pudais Vus deponer las tavlas dal numer tar l’Uffizi per il traffic sin via da Voss chantun da domicil. Vus pudais trametter las tavlas per posta u las dar giu al spurtegl da l’uffizi. L’Uffizi per il traffic sin via infurmescha Vossa assicuranza. Entant che las tavlas èn deponidas, na stuais Vus betg pajar l’assicuranza da responsabladad e la taglia da vehichels a motor.
Tavlas dal numer deponidas restan a partir da la data da restituziun per in tschert temp reservadas per la possessura u per il possessur. La durada da la reservaziun variescha da chantun tar chantun. Ella importa dentant almain in onn. As infurmai tar l’Uffizi per il traffic sin via da Voss chantun da domicil.
Sche Vus vulais puspè duvrar Voss vehichel, al pudais Vus annunziar danovamain. Per quai duvrais Vus in attest d’assicuranza.
Vender il vehichel
Sche Vus vendais Voss vehichel, lura dais Vus vinavant il document dal vehichel a la nov possessura u al nov possessur.
Vossas tavlas dal numer veglias tegnais Vus. Vus las pudais duvrar per in vehichel nov.
En cas che Vus na remplazzais betg Voss vehichel vendì, returnais Vus las tavlas dal numer a l’Uffizi per il traffic sin via.
Sche Vus allontanais Voss vehichel, laschai annullar il document dal vehichel tar l’Uffizi per il traffic sin via.
Sche Vus retrais l’annunzia d’in vehichel cun tavlas da numers transferiblas, alura annullescha l’Uffizi per il traffic sin via il document da quest vehichel ed infurmescha l’assicuranza. Eventualmain survegnis Vus ina reducziun da las premias.
Sche Vus avais pers las tavlas dal numer u sch’ellas èn vegnidas enguladas:
Annunzai la perdita da Vossas tavlas dal numer immediatamain al proxim post da polizia u sin Suisse ePolice, il post da polizia digital da las polizias svizras. Vus survegnis in rapport da polizia.
Annunziai la perdita suenter er a l’Uffizi per il traffic sin via da Voss chantun da domicil.
Avais Vus ulteriuras dumondas davart l’annunzia u l’annullaziun da l’annunzia da vehichels, As drizzai per plaschair a l’Uffizi per il traffic sin via da Voss chantun da domicil.
Sche Vossa tavla dal numer è ida a perder, annunziai la perdita per plaschair immediatamain al proxim post da polizia u sin Suisse ePolice, il post da polizia digital da las polizias svizras.