Las autoritads svizras online

directamain tar il cuntegn

Tschertgar ils geniturs biologics, lur descendents e l’uffant adoptiv

Mintga uffant adoptiv maioren ha il dretg d’obtegnair infurmaziuns davart l’identitad da ses geniturs biologics. In uffant adoptiv minoren ha quest dretg, sch’el po cumprovar in interess degn da vegnir protegì. In uffant adoptiv maioren po plinavant pretender infurmaziuns davart descendents directs da ses geniturs biologics, sch’ils descendents èn maiorens ed han dà lur consentiment a questa communicaziun.

L’identitad d’in uffant adoptiv maioren dastga vegnir communitgada als geniturs biologics mo, sche l'uffant ha dà ses consentiment explicit a questa communicaziun. Sche l’uffant è minoren, dovri tant il consentiment dals geniturs adoptivs sco quel da l’uffant.
Ils descendents directs dals geniturs biologics han medemamain la pussaivladad d’obtegnair infurmaziuns davart l’uffant adoptiv, premess che quel saja maioren ed haja dà ses consentiment a questa communicaziun.

Avant che questas datas vegnan communitgadas, infurmescha il post d’infurmaziun chantunal la persuna pertutgada ch’ella haja survegnì ina dumonda d’infurmaziun e dumonda – en cas da basegn – sch’ella è d’accord d’avair contact cun la persuna petenta.

Sche la persuna che ha survegnì la dumonda d’infurmaziun refusa il contact persunal, infurmescha l’autoritad la persuna petenta en chaussa e la renda attent als dretgs persunals da la persuna che ha survegnì la dumonda d’infurmaziun.

Nua pudais Vus inoltrar Vossa dumonda?

Contactai per plaschair il post d’infurmaziun chantunal

  • da Voss chantun da domicil u subsidiarmain
  • dal chantun, en il qual la procedura d’adopziun è vegnida manada tras.