Las autoritads svizras online

directamain tar il cuntegn

Tschertgar ils geniturs biologics e lur figlialanza directa

Mintga uffant adoptiv ha il dretg da pretender infurmaziuns davart las persunalias (num, prenum, lieu d'origin resp. naziunalitad) da ses geniturs biologics il mument da l'adopziun. Per quest intent n'è in consentiment dals geniturs biologics betg necessari. Avant che l'autoritad dispona davart questas indicaziuns e dat infurmaziuns a l'uffant adoptiv, infurmescha ella sche pussaivel ils geniturs biologics en chaussa.

Sch'ils geniturs biologics van d'accord che l'uffant adoptiv entria en contact cun els, communitgescha l'autoritad a l'uffant en scrit las suandantas infurmaziuns actualas davart ils geniturs biologics: num, prenum, lieu d'origin resp. naziunalitad ed adressa actual. Autramain na communitgescha ella betg las midadas da num (pervia d'ina maridaglia, d'in divorzi e.u.v.) dapi il mument da l'adopziun e renda l'uffant attent al dretg dals geniturs biologics da mantegnair lur sfera privata.

L’uffant adoptiv maioren po pretender er infurmaziuns davart la figlialanza directa da ses geniturs biologics (fragliuns u mezs fragliuns). Questas infurmaziuns retschaiva el dentant mo, sche la figlialanza è medemamain maiorenna e va d’accord da laschar transmetter lur infurmaziuns persunalas a l’uffant adoptiv.

Cura pudais Vus far Vossa dumonda?

Sche Vus vulais intercurir l'identitad da Voss geniturs biologics, pudais Vus far ina dumonda uschespert che Vus avais accumplì il 18avel onn da vegliadetgna. Sche Vus pudais far valair in interess degn da vegnir protegì, survegnis Vus gia anticipadamain questas indicaziuns.

Sche Vus n’essas anc betg maioren, avais Vus en mintga cas il dretg da survegnir infurmaziuns davart Voss geniturs biologics, ma questas infurmaziuns na dastgan permetter naginas conclusiuns areguard lur identitad (p.ex. infurmaziuns davart il motiv, pertge che Voss geniturs biologics As han dà liber per l’adopziun).

A tgi pudais Vus drizzar cun vossa dumonda?

Entrai en contact cun l'autoritad:

  • da la vischnanca da Voss chantun da naschientscha, sche Vus essas naschì en Svizra,
  • da Voss chantun, nua che vossa adopziun è vegnida fatga u reconuschida, sche Vus essas vegnis adoptads a l’ester,
  • u As drizzai alternativamain al chantun, nua l’adopziun è vegnida fatga.