Las autoritads svizras online

directamain tar il cuntegn

Tschains da locaziun – dretgs ed obligaziuns dals locataris

Locaturs surlaschan in object da locaziun a locataris per in tschains da locaziun. Il tschains da locaziun sto per regla vegnir pajà per il cumenzament dal mais. Ultra dal tschains da locaziun ston plinavant vegnir pajads ils custs accessorics (stgaudament, aua chauda e.u.v.). Sch'il contract n'inditgescha nagins custs accessorics, èn quels cuntegnids en il tschains da locaziun.

Tschains ipotecar actual: 1,5%

Cura pon ins pretender ina reducziun dal tschains da locaziun?

En tscherts cas pudais Vus sco locatari dumandar en scrit cun ina brev recumandada Voss locatur da reducir il tschains da locaziun, p.ex. sche la basa da calculaziun è sa midada considerablamain, perquai ch'il tschains ipotecar da referenza è vegnì sbassà en relaziuns da locaziun. Il locatur ha temp durant 30 dis da prender posiziun davart la dumonda da reducziun. Suenter po el – sche necessari – sa drizzar a l'autoritad da mediaziun.

Sche Vus surpigliais l'abitaziun e constatais che Vus pajais in bun pau dapli ch'il locatari precedent, pudais Vus contestar il tschains inizial entaifer 30 dis tar l'autoritad da mediaziun. Il medem vala, sche Vus As sentis sfurzà da far il contract da locaziun pervi d'ina situaziun d'urgenza persunala u pervi da la purschida limitada da localitads d'abitar sin il martgà local. Il tschains da locaziun sto però en mintga cas vegnir pajà vinavant, eventualmain deposità en in lieu inditgà da l'autoritad da mediaziun.

En cas d'ina reducziun da la valur da l'abitaziun (mancanzas, lavurs da renovaziun) po il locatari pretender ch'il tschains da locaziun vegnia reducì, fin che las mancanzas èn messas en urden.

Co pon ins proceder cunter in augment dal tschains da locaziun?

Ils tschains da locaziun pon vegnir augmentads da tut temp sin il proxim termin da desditga pussaivel. En quest connex ston però vegnir resguardadas tschertas reglas (termin – per regla 3 mais plus 10 dis –, formular approvà dal chantun, motivaziun). Ils locaturs ston motivar cleramain l'augment envers ils locataris. Ils motivs pon esser in augment dal tschains da referenza, la chareschia generala, custs da mantegniment pli auts u investiziuns che augmentan la valur, sco p.ex. l'installaziun d'ulteriurs apparats da cuschina.

Sch'ils locataris dubiteschan che l'augment saja legitimà, pon els sa drizzar a l'autoritad da mediaziun cumpetenta. Quella gida d'ina vart cun cussegls, da l'autra vart è ella dentant er il post da consultaziun, sch'in locatari vul contestar l'augment (entaifer 30 dis). En quest cas vegn il locatari protegì tras la lescha cunter ina desditga. Il tschains da locaziun sto però en mintga cas vegnir pajà vinavant, eventualmain deposità en in lieu inditgà da l'autoritad da mediaziun.

Infurmaziuns, cussegliaziun

Autoritad chantunala da mediaziun (infurmaziuns, cussegliaziun, models)

L'autoritad da mediaziun infurmescha e cusseglia tant ils locataris sco er ils locaturs. Tar l'autoritad da mediaziun pon vegnir retratgs il formulars necessaris.

Associaziuns da locataris resp. da locaturs

Er las associaziuns da locataris resp. da locaturs sustegnan las dumondas ed ils interess dals locataris resp. dals locaturs en connex cun il tschains da locaziun.