Las autoritads svizras online

directamain tar il cuntegn

Taxaziun da vaglias e d'assicuranzas

Tgi che posseda vaglias, sto menziunar quellas en la decleraziun da taglia. Tgi ch'emetta u fa commerzi cun vaglias, sto pajar taxas da bul.

Taxaziun dal possess da vaglias

Las vaglias naziunalas ed estras èn suttamessas a la taglia sin la facultad, lur retgavs èn suttamess a la taglia.

Ils gudogns sin ils curs d'aczias e d'obligaziuns èn libers da taglia, sch’els èn en possess privat e sch’ils investiturs na sa classifitgeschan betg sco investiturs professiunals. Ils tschains da contos da spargn e d'obligaziuns sco er ils pajaments da dividendas, ils dretgs da suttascripziun en cas d'augments dal chapital e las aczias gratuitas èn suttamess a la taglia sin las entradas.

Infurmaziuns davart il register da las vaglias

Vaglias e lur retgavs ston vegnir inditgads sin il formular «Register da las vaglias» da la decleraziun da taglia. Las vaglias e lur renditas en furma da tschains èn suttamessas a la taglia anticipada.

Taxaziun da l'emissiun e da commerzi

L'emissiun ed il commerzi cun vaglias sco aczias ed obligaziuns sco er cun premias d'assicuranza vegnan suttamess a la taglia cuntaxas da bul. Questas taxas da bul vegnan incassadas da la Confederaziun.

Ins distingua ils suandants geners da taxas da bul:

  • La taxa d'emissiun vegn incassada sin l'emissiun da dretgs da participaziun naziunals. La taxa cumpiglia l'emissiun – cunter pajament u gratuita – e l'augment da la valur nominala da dretgs da participaziun (aczias, quotas da basa e.u.v.). Per ils dretgs da participaziun sto la societad svizerapajar la taxa.
    Per ils dretgs da participaziun che vegnan emess cunter pajament a chaschun d'ina fundaziun u da l'augment dal chapital vala actualmain en general in import betg taxà dad 1 milliun francs. La constituziun u l'augment da dretgs da participaziun en connex cun fusiuns, cun transfurmaziuns u cun spartiziuns da societads da chapital u d'associaziuns sco er il transferiment da la sedia d'ina societad estra en Svizra èn exceptads da la taxa d'emissiun.
  • La taxa da svieuta importa 1,5 per vaglias naziunalas e 3 per vaglias estras e vegn engrevgiada a chaschun da la cumpra e da la vendita da vaglias. Suttamess a l’obligaziun da pajar la taxa è il commerziant da valurs svizzer che sa participescha a la fatschenta suttamessa a la taglia sco mediatur ubain sco part contractanta.
  • La taxa sin premias d'assicuranza importa 5% (assicuranzas da vita recumprablas tras ina premia unica 2,5%). Questa taxa pertutga ils pajaments da las premias per las assicuranzas da responsabladad, da fieu, da casco e da mobigliar. Exceptadas da la taxa èn en spezial las assicuranzas da vita cun pajaments periodics da las premias sco er las assicuranzas da malsauns, cunter accidents, d'invaliditad e cunter la dischoccupaziun.