Las autoritads svizras online

directamain tar il cuntegn

Taxaziun da donaziuns

L’object da la taglia sin donaziuns èn donaziuns voluntaras e gratuitas da valurs da facultad tranter vivs.

La taglia sin donaziuns sto pajar il retschavider da la donaziun. La basa da calculaziun è la valur da la facultad transferida. Donaziuns d'objects persunals e da rauba da chasa na vegnan betg suttamessas a la taglia. Per regla èn conjugals e persunas en partenadi registrà che ertan tranter els, sco er descendents, uffants confidads u uffants da tgira libers da questa taglia.

La gronda part dals chantuns incassan ina taglia sin donaziuns. Questa taglia duai evitar, che la taglia sin l'ierta vegnia guntgida cun far donaziuns.

Il retschavider sto declerar la donaziun cun agid d'ina decleraziun da taglia separada, ed a partir da la data dal transferiment sto la donaziun vegnir suttamessa a la taglia sco facultad en la decleraziun da taglia normala. Observai ils termins da l'annunzia da la donaziun e dal pajament da la taglia sin donaziuns.

Per infurmaziuns davart la taglia sin donaziuns As drizzai a l'uffizi chantunal da taglia da l'ultim chantun da domicil da la donatura u dal donatur. Per immobiglias As drizzai a quella vischnanca, nua che l'immobiglia sa chatta.

Autoritads da taglia dals chantuns – taglia sin donaziuns

Per la donaziun d'immobiglias sto per regla vegnir pajada ina taglia sin midada da maun.