La taglia sin l’ierta ston pajar las ertavlas ed ils ertavels.
Per regla èn ils conjugals, las persunas che vivan en in partenadi registrà e lur descendents (uffants e biadis) deliberads da la taglia. Er deliberads da la taglia èn figliastras e figliasters sco er uffants da tgira. Quai vala dentant mo en quels chantuns, en ils quals quests uffants han ils medems dretgs sco ils agens uffants.
La basa per calcular la taglia sin l’ierta furma la valur da la facultad ertada. Donaziuns d’objects persunals e da rauba da chasa n’èn en la gronda part dals chantuns betg suttamessas a la taglia.
L’autezza da la tariffa da taglia e cun quai da la taglia dependa per regla dal suandant:
da la valur da la facultad ertada u transferida a maun d’in testament
e/u dal grad da parentella da l’ertavla u da l’ertavel cun la persuna defuncta: pli datiers parent ch’ins è, e pli bassa che la tariffa da taglia è. Ertavlas ed ertavels betg parents pajan damai ina taglia cleramain pli auta che ertavlas ed ertavels parents.
Sche la persuna defuncta viveva a l’exteriur u sch’ina ertavla u in ertavel viva a l’exteriur, dentant er sch’ina immobiglia ertada sa chatta a l’exteriur, sa tschenta la dumonda a tge dretg che questa ierta è suttamess. I dat il ristg, ch’i sto vegnir pajada ina taglia per la medema ierta en plirs pajais.
Per evitar ina tala imposiziun dubla da taglia ha la Svizra concludì cunvegnas correspundentas cun differents stadis.
Per infurmaziuns davart la taglia sin l’ierta As drizzai a las autoritads da taglia dal chantun da l’ultim domicil da la persuna defuncta che As ha relaschà ina facultad. Autoritads chantunalas da taglia – Taglia sin l’ierta
Per ulteriuras infurmaziuns davart l’imposiziun dubla da taglia As drizzai al Secretariat da stadi per dumondas da finanzas internaziunalas (partiziun Cunvegna davart l’imposiziun dubla da taglia), a las autoritads da taglia dals stadis correspundents u ad ina experta u in expert da taglia.
Infurmaziuns e broschuras da l’Administraziun federala da taglia davart il sistem fiscal en Svizra
Sche Vus avais ertà ina immobiglia, As drizzai a la vischnanca, nua che l’immobiglia sa chatta.
- Nagins resultats