Ina buna preparaziun simplifitgescha d’emplenir la decleraziun da taglia. I cunvegn da rimnar e da preparar ils documents necessaris gia durant l’onn. Latiers tutgan ils suandants documents:
Per declerar las entradas e la facultad:
il(s) attest(s) da paja (per persunas emploiadas)
la contabilitad (per persunas cun activitad da gudogn independenta)
las attestaziuns da rentas (per persunas pensiunadas e.a.)
ils extracts da contos da banca u da posta
las attestaziuns da vaglias
Per las deducziuns:
las attestaziuns da las contribuziuns a la pitga 3a (provediment voluntar)
ils custs da malsognails custs da professiun
ils custs da furmaziun supplementara e da rescolaziun
las attestaziuns da donaziuns
per proprietarias e proprietaris d’abitaziuns e da chasas: tut ils documents davart la taglia sin immobiglias e davart ils tschains da debits, ils quints per lavurs da mantegniment e da renovaziun, ils custs da gestiun e d’administraziun e.u.v.
En la decleraziun da taglia stuais Vus declerar las entradas d’activitads da gudogn dependentas, d’activitads da gudogn independentas e d’in eventual gudogn accessoric. Per la maioritad dals pajataglias vul quai dir: Vus stuais inditgar la summa da la paja netta da l’attest da paja en il spazi correspundent da la decleraziun da taglia.
Ultra dal gudogn stuais Vus declerar anc autras entradas (p.ex. aliments, entradas da vaglias, gudogns da gieus per daners). Persunas pensiunadas decleran lur rentas da la AVS e dal provediment professiunal.
Infurmaziuns detagliadas davart la taglia sin las entradas chattais Vus en las publicaziuns da l’Administraziun federala da taglia.
Deducziuns
Da Vossas entradas minus las deducziuns resultan Vossas entradas suttamessas a la taglia. Quellas èn la basa per calcular la taglia sin las entradas.
Tranter auter pudais Vus far las suandantas deducziuns:
Expensas: Las expensas cumpiglian ils custs directs per exercitar Vossa professiun. Per las persunas emploiadas èn quai tranter auter ils custs per il viadi a la lavur u per mangiar ordaifer. Per las persunas cun activitad da gudogn independenta pon quai esser ils custs per la locaziun da biros u per l’amortisaziun da vehichels u d’utensils.
Deducziuns generalas: Deducziuns limitadas èn pussaivlas tranter auter tar ils tschains da Voss debits privats, tar ils custs da sanadad che Vus avais surpiglià sezza u sez u tar Vossas contribuziuns ad in’assicuranza da vita u a la 3. pitga. Er sche Vus avais fatg donaziuns ad instituziuns d’utilitad publica u investì en ina furmaziun supplementara, pudais Vus far deducziuns da Vossas entradas.
Deducziuns socialas: Las deducziuns socialas distgargian tranter auter famiglias (deducziuns per uffants, deducziuns per la tgira da terzas persunas), persunas pli veglias e persunas cun impediments (deducziuns per persunas cun rentas da la AVS e da la AI).
Tge che Vus pudais deducir da Vossas entradas variescha da chantun a chantun. Resguardai il mussavia chantunal che Vus survegnis cun la decleraziun da taglia. Las administraziuns chantunalas da taglia mettan er a disposiziun infurmaziuns online e respundan directamain a Vossas dumondas.
Per la maioritad dals pajataglias è la taglia sin las entradas il pli grond post dal quint da taglia. Tut ils chantuns e tut las vischnancas incasseschan dentant er anc ina taglia sin la facultad.
En Vossa decleraziun da taglia stuais Vus declerar tranter auter las suandantas valurs da facultad: bains immobigliars, vaglias, daners bluts, activas da contos, assicuranzas da vita e da rentas (valur da recumpra). Vossas mobiglias na stuais Vus betg declerar, la collecziun d’art custaivla dentant bain.
Infurmaziuns detagliadas davart la taglia sin la facultad chattais Vus tar l’Administraziun federala da taglia.
Deducziuns
Da Vossa entira facultad minus las deducziuns resulta Vossa facultad suttamessa a la taglia.
Ils debits (p.ex. ipoteca u credit pitschen) pon vegnir deducids da la facultad en tut ils chantuns. La maioritad dals chantuns permetta ultra da quai deducziuns socialas ed imports libers da taglia.
Quant che Vus pudais exactamain deducir da Vossa facultad, dependa dal chantun. Resguardai il mussavia chantunal che Vus survegnis cun la decleraziun da taglia. Las administraziuns chantunalas da taglia mettan er a disposiziun infurmaziuns online u respundan directamain a Vossas dumondas.
L’Administraziun federala da taglia publitgescha er curtas survistas naziunalas davart differentas deducziuns (Confederaziun/chantuns).
La decleraziun da taglia survegnis Vus per regla da l’administraziun chantunala da taglia, a la quala Vus la stuais inoltrar. En tut ils chantuns èsi pussaivel d’emplenir la decleraziun da taglia sin via electronica u directamain online.
Dumandar ina prolungaziun dal termin
Per regla avais Vus temp 30 dis per emplenir e per inoltrar la decleraziun da taglia. Il termin è inditgà sin ils formulars. Sche Vus na pudais betg emplenir la decleraziun aifer il termin, pudais Vus dumandar ina prolungaziun.
Agid
En cas da dumondas davart la decleraziun da taglia As drizzai a l’administraziun da taglia da Voss chantun. La purschida d’infurmaziuns online è gronda e Vus pudais er contactar directamain l’administraziun chantunala da taglia.
Sche Vus vulais surdar Vossa decleraziun da taglia ad ina cussegliadra u ad in cussegliader da taglia professiunal, pudais Vus As infurmar tar ina da las associaziuns professiunalas (Treuhand Schweiz, ExpertSuisse).
Conjugals empleneschan ina decleraziun da taglia cuminaivla. Las duas entradas vegnan dumbradas ensemen e suttamessas ensemen a la taglia. Il medem vala per persunas en in partenadi registrà.
La Confederaziun ed ils chantuns han introducì levgiaments (splitting, tariffa per persunas maridadas), per che conjugals e persunas en in partenadi registrà n’hajan nagins dischavantatgs da taglia envers pèrs en concubinat.
Infurmaziuns detagliadas davart l’imposiziun da taglia da famiglias chattais Vus en las publicaziuns da l’Administraziun federala da taglia.
Persunas da l’exteriur cun ina permissiun da domicil (legitimaziun C) decleran lur entradas e lur facultads cun la decleraziun normala da taglia. Las ulteriuras persunas da l’exteriur emploiadas èn suttamessas a la taglia a la funtauna
steuern-easy.ch – exercitar d’emplenir la decleraziun da taglia a maun d’exempels simplifitgads, infurmaziuns per giuvens pajataglias
Administraziuns chantunalas da taglia – infurmaziuns, decleraziun da taglia electronica, contacts
Administraziun federala da taglia – dossiers infurmaziuns da taglia
Administraziun federala da taglia – mappa da taglia