Sche Vus avais debits tar ina persuna, po quella (creditura/creditur) far ina dumonda da scussiun tar l'uffizi da scussiun ed uschia incassar l'import betg pajà cun agid dal stadi. Vus vegnis inscritta u inscrit en il register da scussiun.

Per regla survegnis Vus l'emprim in'admoniziun per in quint betg pajà. La creditura u il creditur n'è dentant betg obligada u obligà da trametter ina tala.

Acceptar in avis da pajament

Sche insatgi ha introducì ina procedura da scussiun cunter Vus, survegnis Vus in avis da pajament da l'uffizi da scussiun. La posta u l'uffizi da scussiun surdat l'avis da pajament a Vus persunalmain.

Pajar il debit

Sche la pretensiun tenor l'avis da pajament è giustifitgada e sche Vus debitais effectivamain ils daners, avais Vus temp da pajar l'import entaifer 20 dis. Sche Vus avais difficultads da liquiditad, vali la paina da sa laschar cussegliar e da contactar la creditura u il creditur. Eventualmain pudais Vus far ina cunvegna (p.ex. per in pajament en ratas).

Far opposiziun – contestar il debit

Sche Vus n'essas betg d'accord cun la pretensiun e sche Vus essas da l'avis, che Vus n'hajas betg in tal debit, stuais Vus far opposiziun cunter la scussiun. Quai pudais Vus far a bucca u en scrit, a chaschun da la consegna da l'avis da pajament u entaifer 10 dis suenter la consegna tar l'uffizi da scussiun.

Cun l'opposiziun propona la persuna stumada per uschè dir la via giudiziala. Ella communitgescha a la creditura u al creditur, ch'ella na renconuscha betg il debit e che la creditura u il creditur sto sa drizzar ad ina dretgira, sch'ella u el vul cuntinuar cun la scussiun.

Suenter l'opposiziun decida pia ina dretgira – sin dumonda da la creditura u dal creditur –, sche la procedura da scussiun po cuntinuar. La creditura u il creditur sto declerar che sia pretensiun è giustifitgada. Sche quai reussescha, liquidescha la dretgira l'opposiziun e la creditura u il creditur po cuntinuar cun la scussiun.

Impegnaziun

Sche Vus n'avais betg fatg opposiziun suenter la consegna da l'avis da pajament u sche l'opposiziun è vegnida liquidada da la dretgira (guardar qua survart), po la creditura u il creditur cuntinuar cun la procedura da scussiun. L'uffizi da scussiun po realisar l'impegnaziun da Vossas valurs da facultad e da Vossas entradas per pajar las pretensiuns da la creditura u dal creditur. L'impegnaziun vul dir: L'autoritad incumbensescha il patrun da la debitura u dal debitur d'assegnar la part impegnabla dal futur salari directamain a l'uffizi da scussiun (uschenumnada impegnaziun dal salari). Pussaivel èsi er da sequestrar objects da valur che tutgan a la debitura u al debitur, per che tals possian vegnir vendids tras ingiant.

S'infurmar davart la procedura da scussiun e sa laschar cussegliar

Tar las cussegliaziuns chantunalas da debits chattais Vus infurmaziuns, sche Vus vegnis stumada u stumà ubain sche Vus avais problems finanzials. Vossas dumondas davart la procedura da scussiun pudais Vus far a l'uffizi da scussiun cumpetent.

Sche insatgi ha debits tar Vus, èsi usità, dentant betg in'obligaziun, d'admonir sco emprim la debitura u il debitur. Sche quai na porta nagin success, pudais Vus introducir ina procedura da scussiun.

Introducir la scussiun

Sche Vus vulais stumar insatgi, stuais Vus inoltrar ina dumonda da scussiun a l'uffizi da scussiun dal domicil da la debitura u dal debitur. Al spurtegl da scussiun online pudais Vus emplenir la dumonda da scussiun en furma electronica e consultar las infurmaziuns necessarias.

Cuntinuar cun la scussiun

Sche Vossa pretensiun è giustifitgada e sche la debitura u il debitur n'ha betg pajà, malgrà l'avis da pajament, pudais Vus cuntinuar cun la procedura da scussiun. Al spurtegl da scussiun online pudais Vus emplenir la dumonda da cuntinuaziun en furma electronica e consultar las infurmaziuns necessarias.