En l'extract dal register da scussiun èn registradas las proceduras da scussiun ch'èn vegnidas avertas durant ils ultims 5 onns cunter Vus.
Savens pretendan locaturas e locaturs quests documents, sch'els vulan dar en locaziun ina abitaziun e sch'els vulan esser segirs che Vus pajais per ordinari Voss quints. Per la medema raschun vegn l'extract er pretendì, sche Vus vulais prender si in credit da banca u cumprar in auto en leasing. Vus stuais er mussar quest document, sche Vus vulais As laschar natiralisar en Svizra.
Vus pudais empustar in extract da las scussiuns ch’èn avertas cunter Vus ubain cunter in’autra persuna.
Per l’empustaziun da Voss agen extract, stuais Vus preschentar ina copia d’in document d'identitad.
Per l’extract dal register d’ina autra persuna duvrais Vus in plainpudair suttascrit da questa persuna sco er ina copia d’in document d'identitad da quella.
Vus pudais er empustar in extract dal register da scussiun d’ina autra persuna, senza infurmar questa persuna. Vus stuais però cumprovar che Vus avais in interess particular vi da l’extract. Quai è per exempel il cas, sche Vus vulais dar en locaziun in’abitaziun u emprestar daners ad ina persuna. Agiuntai a Vossa dumonda ina cumprova da Voss interess (precontract davart locaziun u vendita) e la copia d’in document d'identitad.
I dat duas variantas per empustar l’extract:
Vus pudais emplenir il formular online ed al trametter per posta u per e-mail a l’uffizi da scussiun da Voss chantun da domicil, ubain
Vus pudais empustar l'extract persunalmain al spurtegl da l’uffizi da scussiun da Voss chantun da domicil.
L'inscripziun en il register da scussiun vegn stizzada automaticamain 5 onns suenter che la procedura da scussiun è terminada. Avant la scadenza da quest termin:
Pudais Vus pretender da Vossas credituras e da Voss crediturs, ch’els revocheschian la scussiun e ch’els procurian che l’inscripziun en il register vegnia stizzada. Quai po esser il cas, sche Vus avais en il fratemp pudì As cunvegnir cun ellas u cun els u sche Vus avais pajà Voss debits.
Mida l’uffizi da scussiun sez u sin Vossa dumonda inscripziuns betg giustifitgadas.
Pudais Vus pretender da l’uffizi dal register da scussiun da betg registrar la scussiun en l’extract dal register da scussiun. Quel As infurmescha davart las premissas ed ils custs.
L’extract dal register da scussiun custa per regla 17 francs plus custs da spediziun.