Sche Vus avais problems finanzials, sche Vus na pudais betg pli pajar Voss quints averts u sche Vus vegnis gia stumads, lura duessas Vus tschertgar agid. En mintga chantun datti posts da cussegliaziun da debits publics.
Organisaziuns u persunas a las qualas Vus debitais daners, èn Voss uschenumnads crediturs. Sche Vus n’essas betg abla u abel da pajar ils debits a temp, pudais Vus sa cunvegnir cun Vossas credituras e Voss crediturs, quant che Vus pajais fin cura. Voss budget As duess permetter da pajar la summa fixada entaifer 3 onns.
Tut las credituras ed ils crediturs ston esser d’accord cun Vossa proposta, per che la cunvegna d'amortisaziun reusseschia. Uschè ditg che Vus respectais la cunvegna, n'As pon las credituras ed ils crediturs lura betg pli stumar.
Il post da cussegliaziun da debits en Voss chantun As infurmescha en moda detagliada davart questa uschenumnada sanaziun da debits extragiudiziala ed As gida tar la realisaziun.
Sch’i n’è betg pussaivel da far ina cunvegna d'amortisaziun (guardar survart), pudais Vus tschertgar ina soluziun cun agid da la dretgira. Per far quai, stuais Vus far ina dumonda a la dretgira responsabla da Voss lieu da domicil. Ils posts da cussegliaziun da debits gidan en quest connex.
Sche la dretgira entra en la dumonda, ferma ella las scussiuns cun in uschenumnà moratori e nominescha in curatur. Il stop da las scussiuns dat il temp per preparar ina proposta per liquidar ils debits. Tar las proceduras giudizialas per sanar ils debits resultan custs da dretgira che Vus sco debitura u debitur stuais pajar.
Infurmaziuns detagliadas davart la sanaziun giudiziala dals debits chattais Vus sut ils chavazzins «rectificaziun dals debits en enclegientscha» e «contract d'accumodament giudizial» tar las cussegliaziuns da debits e tar las dretgiras responsablas.
Sch’i n’è betg pli pussaivel da far ina sanaziun dals debits, pudais Vus As laschar declerar sco insolvent e far la dumonda per l'avertura d’in concurs privat.
Vossa facultad vegn repartida sin Vossas credituras e Voss crediturs. Per ils debits ch’èn anc averts survegnis Vus certificats da debit. Il concurs privat n’annullescha betg Voss debits, ferma però las scussiuns uschè ditg che Vus n’obtegnais nagina nova facultad. Ultra da quai schlia il concurs privat in'eventuala impegnaziun dal salari. Vus pudais pia puspè disponer da tut Voss salari. A disposiziun avais Vus uschia dapli daners ch’il minimum d'existenza tenor il dretg da scussiun. Il concurs privat po uschia gidar a sa revegnir finanzialmain.
Per infurmaziuns detagliadas davart la procedura da concurs, As drizzai a l’uffizi da concurs u als posts da cussegliaziun da debits
Cussegliaziun da debits (funtaunas d'infurmaziun tenor la federaziun tetgala):
Infurmaziuns: Caritas, Schuldeninfo, Plusminus
concurs d’interpresas: il portal per IPM infurmescha