Las autoritads svizras online

directamain tar il cuntegn

Taglia d'exemziun dal servetsch militar

Umens svizzers che na fan ni servetsch militar ni servetsch civil, ston pajar ina taglia d'exemziun dal servetsch militar.

Cumenzament e fin da l'obligaziun da cumpensaziun

La durada da l’obligaziun da cumpensaziun è liada a la durada da l’obligaziun da far servetsch. Ella cumenza il pli baud a l’entschatta da l’onn, en il qual la persuna obligada da far servetsch cumplenescha 19 onns, e dura fin il pli tard la fin da l’onn, en il qual ella cumplenescha 37 onns. Durant questa perioda vegnan incassadas da las persunas inablas per il servetsch maximalmain 11 taxas annualas.

Cun fixar la taglia militara annuala vegnan quintads ils servetschs da protecziun civila: Per mintga di da servetsch da protecziun civila prestà sa reducescha la taglia militara per 4 pertschient.

Import da la taglia d'exemziun dal servetsch militar

La taglia d'exemziun dal servetsch militar munta per onn a 3 % da l'entrada suttamessa a la taglia federala directa (guardar decleraziun da taglia), importa dentant almain 400 francs.

Restituziun

Tgi che ha ademplì l’entira obligaziun da far servetsch, ha il dretg d’ina restituziun da las taxas ch’el ha pajà. Il dretg da restituziun scada tschintg onns suenter la liberaziun dal servetsch militar u dal servetsch civil. La dumonda da restituziun sto vegnir fatga tar l’autoritad chantunala per la taglia d'exemziun dal servetsch militar. Sin ils imports da restituziun na vegn pajà nagin tschains.

Inoltrar ina dumonda da restituziun tar l’autoritad chantunala