Tschertga

Al cuntegn
Siglia al cuntegn da la paginaSiglia a la navigaziunSiglia a la tscherna da la linguaSiglia a la tscherna da la linguaRespostas simplas davart la vita en Svizra
  • DE
  • FR
  • IT
  • RM
  • EN
Respostas simplas davart la vita en Svizra
  • Tut ils temas
  • Sistem politic
  • Partidas politicas
  • Finanziaziun da las partidas
Tut ils temas
  • Sistem politic
  • Partidas politicas
  • Finanziaziun da las partidas

Transparenza davart la finanziaziun da la politica svizra

Bainbaud pudais Vus vegnir a savair, tgi che finanziescha las partidas represchentadas en il Parlament svizzer, las campagnas electoralas e da votaziun federalas. Ina survista da las novas obligaziuns da transparenza.

Actual

L'obligaziun da transparenza sto vegnir applitgada per l'emprima giada a chaschun da las elecziuns federalas 2023.
Tut ils temas
  • DE
  • FR
  • IT
  • RM
  • EN
L'obligaziun da transparenza vala per

  • las partidas politicas represchentadas en l'Assamblea federala sco er per las parlamentarias ed ils parlamentaris senza partida (las secziuns chantunalas e localas da partidas n'èn en general betg pertutgadas);

  • persunas ed organisaziuns politicas ch'investeschan dapli che 50 000 francs per ina campagna en vista d'ina elecziun en il Cussegl naziunal u d'ina votaziun federala;

  • persunas u organisaziuns politicas che han investì dapli che 50 000 francs per ina elecziun reussida en il Cussegl dals chantuns

L'obligaziun da transparenza variescha tut tenor las acturas ed ils acturs politics e tut tenor la campagna. Donaziuns anonimas u donaziuns che derivan da l'exteriur èn en general scumandadas (cun l'excepziun da donaziuns per finanziar campagnas per il Cussegl dals chantuns). Donaziuns da Svizras e Svizzers a l'exteriur èn permessas.
La suandanta illustraziun mussa las finanziaziuns che ston vegnir decleradas da las acturas e dals acturs politics:
Las partidas politicas represchentadas en l'Assamblea federala sco er parlamentarias e parlamentaris senza partida ston declerar:

  • tut las donaziuns (incl. donaziuns en natiralias) sur 15 000 francs per donatura u donatur e per onn (cun l'identitad da l'autura u l'autur, la valur da la donaziun e la data da la surdada);

  • lur entradas da l’onn chalendar passà (mo per las partidas);

  • las contribuziuns da lur persunas elegidas e d'autras titularas e d'auters titulars da mandats (mo per las partidas).

Las persunas ed organisaziuns politicas ch'investeschan dapli che 50 000 francs per ina campagna da votaziun federala u d'elecziun en il Cussegl naziunal ston declerar:

  • tut las donaziuns (incl. donaziuns en natiralias) sur 15 000 francs per donatura u donatur retschavidas durant ils 12 mais avant la votaziun (cun l'identitad da l'autura u l'autur, la valur da la donaziun e la data da la surdada);

  • las entradas budgetadas;

  • il quint final da las entradas.

Las persunas e las organisaziuns politicas che han investì dapli che 50 000 francs per in'elecziun reussida en il Cussegl dals chantuns ston declerar:

  • tut las donaziuns (incl. donaziuns en natiralias) sur 15 000 francs per donatura u donatur e per campagna retschavidas durant ils 12 mais avant l'elecziun (cun l'identitad da l'autura u l'autur, la valur da la donaziun e la data da la surdada);

  • tut las donaziuns anonimas e donaziuns che derivan da l'exteriur retschavidas durant ils 12 mais avant l'elecziun, independentamain da la summa (donaziuns da Svizras e Svizzers a l'exteriur n'èn betg pertutgadas);

  • il quint final da las entradas.

Vus pudais consultar las datas decleradas davart la finanziaziun da las campagnas e da las partidas politicas durant tschintg onns. Qua ina survista dals termins previs:

Avant la votaziun u l'elecziun

  • Per ina campagna d'elecziun en il Cussegl naziunal u da votaziun federala pudais Vus consultar las entradas budgetadas (incl. donaziuns empermessas u gia retschavidas) circa 1 mais avant la votaziun u l'elecziun.

  • Las infurmaziuns davart las donaziuns retschavidas curt avant la votaziun u l'elecziun vegnan publitgadas dafertanttiers.

Suenter la votaziun u l'elecziun

  • Suenter ina campagna d'elecziun en il Cussegl naziunal u da votaziun federala pudais Vus consultar il quint final da la campagna (incl. donaziuns retschavidas suenter la votaziun) circa dus mais e mez suenter la votaziun u l'elecziun.

  • Suenter ina elecziun en il Cussegl dals chantuns pudais Vus consultar il quint final da campagna var in mais e mez suenter l'entrada en uffizi da la persuna elegida.

A partir dals 31 d'avust 2024

Las partidas sco er las parlamentarias ed ils parlamentaris senza partida ston declerar lur finanziaziun annuala fin ils 30 da zercladur da l'onn che suonda. Vus pudais consultar questas infurmaziuns per l'emprima giada ils 31 d'avust 2024.
La Controlla federala da finanzas verifitgescha, sche las decleraziuns èn cumplettas e sch'ellas èn vegnidas inoltradas a temp. Ella fa controllas sporadicas concernent l'exactadad da las infurmaziuns furnidas.
Cuntravenziuns annunzia ella a las autoritads da persecuziun penala. Las persunas u organisaziuns persequitadas ristgan da survegnir in chasti da fin a 40 000 francs.
La Controlla federala da finanzas gida er ils acturs politics ad ademplir tut las obligaziuns d’annunzia. Ella als porscha infurmaziuns e scolaziuns per l’utilisaziun dal register electronic.

  • Infurmaziuns da la Controlla federala da las finanzas concernent la transparenza davart la finanziaziun da la vita politica

  • Infurmaziuns da l'Uffizi federal da giustia concernent la transparenza davart la finanziaziun da la vita politica

  • Lescha federala davart ils dretgs politics

  • Ordinaziun concernent la transparenza davart la finanziaziun da la vita politica

Tut ils temas

In servetsch da la Confederaziun, dals chantuns e da las vischnancas

Davart ch.chInfurmaziuns giuridicas
Link YoutubeLink Twitter
VoteInfo