Il dretg vertent en in pajais sa basa sin texts normativs da differentas furmas (convenziuns, constituziun, leschas ubain ordinaziuns). Questas normas n’han betg tuttas la medema valur: intginas dad ellas han ina valur superiura e prevalan las autras. En Svizra ha per exempel ina lescha la prioritad envers las ordinaziuns.
En in stadi federalistic sco la Svizra exista il dretg federal, il dretg chantunal ed il dretg communal.
Plinavant vegn applitgà er il dretg internaziunal ch’è vegnì ratifitgà (acceptà) da la Svizra.
Plinavant vegn applitgà er il dretg internaziunal ch’è vegnì ratifitgà (acceptà) da la Svizra.
Las leschas federalas
Las leschas federalas vegnan decretadas dal Parlament federal. Sia incumbensa principala è la legislaziun (approvar, refusar, abolir u modifitgar las leschas).
La Collecziun sistematica dal dretg federal è ina collecziun electronica dal dretg federal ch’è actualmain en vigur.
Il portal dal dretg federal cumpiglia plinavant ulteriurs texts uffizials da la Confederaziun
Las leschas chantunalas
Las leschas chantunalas vegnan decretadas dals parlaments chantunals. L’incumbensa principala dals parlaments chantunals è la legislaziun (approvar, refusar, abolir u modifitgar las leschas).
Sin LexFind.ch pon ins acceder a tut il dretg federal e chantunal. La gestiun dal portal LexFind.ch vegn finanziada da la Conferenza svizra dals chanceliers chantunals.
Las leschas communalas
Betg tut las vischnancas n’han las medemas cumpetenzas e la medema autonomia. Las leschas communalas sa differenzieschan d’ina vischnanca a l’autra e dependan mintgamai da la constituziun chantunala. Er sin plaun communal vegnan las leschas fatgas da la pussanza legislativa. Las vischnancas pli grondas disponan per il solit d’in parlament. En las vischnancas pli pitschnas vegnan las leschas savens approvadas d’ina radunanza communala.
Las leschas federalas vegnan fatgas da l’Assamblea federala, pia dal parlament che ha la pussanza legislativa.
Mintga organ e mintga persuna – sajan quai burgaisas u burgais (cun il dretg da votar sin plaun federal), gruppas d’interess, parlamentarias u parlamentaris ubain il Cussegl federal – pon inoltrar ina dumonda al parlament per laschar elavurar u modifitgar ina lescha.
La finala èsi dentant adina il parlament che decida, sche ed en tge moda ch’ina lescha federala vegn modifitgada.