Umens cun dretg da burgais svizzer ston far servetsch militar u servetsch civil. Tgi ch'è abel per il servetsch militar ed ha in conflict da conscienza, po far ina dumonda d'admissiun al servetsch civil. Protecziun civila fa, tgi che n'è betg abel per il servetsch militar, ch'è però abel per la protecziun civila (servetsch da protecziun).
Sche Vus essas abel per il servetsch militar, vegn decidì a chaschun da la recrutaziun. Umens e dunnas interessadas vegnan convocadas a la recrutaziun en la vegliadetgna da 19 onns.
Sche Vus vegnis attribuì a la protecziun civila, retschavais Vus dal chantun in termin per la scolaziun da basa. Quella dura 10 fin 19 dis.
Il servetsch cumenza l'onn da la scolaziun da basa. El dura en tut 14 onns u maximalmain 245 dis da servetsch. Vus pudais vegnir convocà per maximalmain 66 dis per onn. La convocaziun retschavais Vus almain 6 emnas avant l'entrada en servetsch. En cas da servetschs da catastrofa u d'agid d'urgenza na vala questa cundiziun betg.
Tgi che sto spustar ina scolaziun u in curs da repetiziun da la protecziun civila, sto inoltrar il pli tard 10 dis avant ch'entrar en servetsch ina dumonda motivada en scrit. L'uffizi convocant decida davart la dumonda. Fin ch'ella n'è betg approvada, stuais Vus entrar en servetsch. Sche mo ina part da la scolaziun u dal curs da repetiziun sto vegnir spustada, pon las persunas ch'èn obligadas da far servetsch er inoltrar ina dumonda da congedi.
Tgi che fa protecziun civila, retschaiva ina cumpensaziun da la perdita da gudogn. Quella cumpensescha la paja durant il temp en servetsch.
Tgi che na fa nagin servetsch militar u servetsch civil, sto pajar la taxa d'exemziun dal servetsch militar. Er sche Vus faschais servetsch civil, stuais Vus pajar la taglia militara. Cun mintga di da protecziun civila prestà sa sminuescha però l'import dal debit per 4 pertschient. La taxa d'exemziun importa 3 pertschient da l'entrada suttamessa a la taglia, però almain 400 francs.
La protecziun civila è da princip averta per tuttas e tuts. Las suandantas persunas pon far voluntarmain servetsch da protecziun:
umens che na ston betg pli far servetsch civil,
umens che n'èn betg pli obligads da far servetsch militar u servetsch civil,
dunnas cun dretg da burgaisa svizzer a partir da 18 onns,
persunas estras che vivan en Svizra a partir da 18 onns,