Co chat jau ina plazza d'emprendissadi?
Sco emprim pudais Vus tscherner ina da passa 240 professiuns. Suenter tschertgais Vus ina interpresa che porscha ina plazza d'emprendissadi. Fitg utila è la banca da datas da la cussegliaziun professiunala che Vus chattais sut berufsberatung.ch.
Co coopereschan il manaschi d'emprendissadi e la scola professiunala spezialisada?
Per il solit surpiglia Voss manaschi d'emprendissadi la scolaziun pratica. Ed en la scola professiunala spezialisada emprendais Vus las basas teoreticas da Vossa professiun. Per part pudais Vus er absolver Voss emprendissadi a temp cumplain en ina scola.
Tut tenor en tge chantun che Vus vulais far ina maturitad e tut tenor tge maturitad che Vus vulais far, stuais Vus ademplir differentas premissas. Per exempel dovri ina buna media da las notas, ina recumandaziun da Vossa magistra da classa u che Vus stuais far cun success in examen d'admissiun.
Maturitad professiunala
En la gronda part dals emprendissadis pudais Vus absolver la maturitad professiunala sco cumplettaziun. En quest cas frequentais Vus ina instrucziun supplementara. Vus pudais er far la maturitad professiunala suenter l'emprendissadi.
Cun la maturitad professiunala pudais Vus studegiar ad ina scol'auta spezialisada. Tgi che ha reussì – ultra da la maturitad professiunala – il examen cumplementar da passarella, po er studegiar ad in'universitad svizra, a la ETH u ad ina scol'auta da pedagogia.
Maturitad al gimnasi
Normalmain cumenzais Vus il gimnasi suenter il segund u terz onn dal stgalim secundar. L'instrucziun al gimnasi dura en ils blers chantuns quatter onns ed ha la finamira d'intermediar bunas enconuschientschas generalas. Vus n'emprendais betg ina professiun. Persuenter pudais Vus studegiar cun la maturitad gimnasiala ad in'universitad u a la ETH. Per in studi ad ina scol'auta spezialisada stuais Vus savens furnir prestaziuns supplementaras, per exempel in praticum.
Maturitad spezialisada a la scola media spezialisada
A la scola media spezialisada engrondis Vus Vossas enconuschientschas generalas. Ultra da quai survegnis Vus ina invista dad in fin dus champs professiunals che Vus tschernis sezza u sez. L'emprima part da la scolaziun dura trais onns. Vus terminais quella cun il certificat da scola media spezialisada. Suenter pudais Vus far la maturitad spezialisada. Quai dura in onn.
Cun il certificat da scola media spezialisada u cun la maturitad spezialisada pudais Vus studegiar sin Voss champ professiunal. Il certificat da scola media spezialisada As maina a la scola spezialisada superiura. La maturitad spezialisada a la scol'auta spezialisada.
Sche Vus vulais studegiar ad in'universitad, a la ETH u ad ina scol'auta da pedagogia, stuais Vus reussir ultra da la maturitad spezialisada er l'uschenumnà examen cumplementar da passarella. Excepziun: Sche Vus avais fatg Vossa maturitad spezialisada sin il champ professiunal pedagogia, essas Vus admessa u admess directamain a la scolaziun da magistra primara u magister primar a la scol'auta da pedagogia.
Maturitad svizra
Vus pudais er absolver l'examen da maturitad svizzer u l'examen federal da maturitad professiunala. Per l'examen As preparais Vus en in studi autodidactic u ad ina scola privata.