Cannabis sco droga scumandada vegn savens tractà sco marihuana / erva (flur da cannabis setga) u haschisch (rascha da cannabis). El cuntegna tetraidrocannabinol (THC).
THC ha in effect enivrant e po periclitar la sanadad.
Decisiv per la classificaziun sco droga scumandada èsi quant THC ch’in product da cannabis cuntegna. A partir d’ina valur dad 1 pertschient è il product scumandà.
Per il consum da cannabis pudais Vus vegnir chastià cun ina multa da 100 francs.
Tge resta impunibel?
Tgi che prepara mo ina pitschna quantitad da cannabis da maximalmain 10 grams per l’agen consum na po betg vegnir chastià. Er tgi che dat ad ina persuna creschida maximalmain 10 grams (ma na venda betg) per consumar cuminaivlamain na po betg vegnir chastià.
Products da cannabis èn permess, sch’els cuntegnan pli pauc ch’in pertschient THC. Exempels èn flurs da chonv, ielis parfumads, itgs u daguts che vegnan consumads.
Er la cultivaziun da chonv privata è permessa, sche la valur da THC da la sort da cannabis è sut 1 pertschient.
En il rom d’emprovas scientificas da pilot cun cannabis e sut cundiziuns rigurusas pon consumentas e consuments plinavant cumprar legalmain products da cannabis.
Reglas per cannabis cun pauc THC e CBD
Er tar products da cannabis cun pauc THC ston surtut las offeridras ed ils offeriders resguardar bleras leschas. Ina rolla gioga latiers la substanza activa nunenivranta cannabidiol (CBD). La Confederaziun ha elavurà in fegl d’infurmaziun davart products cun CBD, che sa drizza surtut ad offeridras ed offeriders.
Precauziun cun cannabis permess
Er cannabis permess cun ina valur totala da THC da pli pauc che 1 pertschient As po chaschunar problems giuridics.
A l’exteriur: En auters pajais valan per part leschas pli severas sco er valurs da THC maximalas pli bassas. Quai vala er per ils stadis vischins. Il cannabis ch'è permess en Svizra po esser scumandà a l’exteriur. As infurmai per plaschair directamain tar las autoritads dals pajais pertutgads, sche Vus vulais prender cun Vus cannabis u products correspundents a l’exteriur.
Durant l'ir cun auto: Sche Vus manischais na dastgais Vus avair nagin THC en il sang. Er il consum dal cannabis permess po effectuar ina valur da THC che po vegnir mesirada en Voss sang. Perquai na duessas Vus betg manischar, suenter che Vus avais consumà cannabis u products correspundents.
Medicaments da cannabis èn permess, sch’ina media u in medi As prescriva tals. En dumonda vegn quai oravant tut, sche Vus patis da fermas dolurs cronicas u spasticas. Pajar ils medicaments da cannabis stuais Vus dentant il pli savens sezza u sez. La cassa da malsauns obligatorica paja tals medicaments mo en cas excepziunals.