Medema prestaziun tar tut las cassas da malsauns
Vossa cassa da malsauns paja la consultaziun ed il tractament, sche Vus essas malsauna u malsaun. Ella surpiglia er diversas mesiras da prevenziun che gidan a mantegnair la sanadad (per exempel vaccinaziuns u consultaziuns dal stadi da sanadad). Mintga cassa da malsauns sto surpigliar las medemas prestaziuns. Quai è reglà en la Lescha federala davart l’assicuranza da malsauns (LAMal).
Vossa media u Voss medi As sto infurmar avant il tractament, sche l’assicuranza da basa na paja betg quest tractament specific. En cas da dubi vali dentant la paina da dumandar suenter tar Vossa cassa da malsauns. L’Uffizi federal da sanadad publica infurmescha detagliadamain davart las prestaziuns da l’assicuranza da basa.
Restricziun tar il model da medis da chasa
En cas che Vus avais tschernì il model da medis da chasa u in auter model per spargnar premias, stuais Vus resguardar las reglas da quest model per retrair prestaziuns. Tar il model da medis da chasa stuais Vus per exempel bunamain adina ir sco emprim tar la media da chasa u tar il medi da chasa, sche Vus giavischais in tractament.
Vus pudais far in’assicuranza supplementara, sche Vus giavischais prestaziuns supplementaras. Las prestaziuns supplementaras cumpiglian per exempel medischina cumplementara sco l'osteopatia u la correctura da dents per uffants. I dat er prestaziuns supplementaras che As garanteschan dapli confort en l’ospital u ina libra tscherna da la media u dal medi.
Franschisa durant la gravidanza
Sche Vus essas en speranza, na stuais Vus per regla betg As participar als custs. Quai vul dir: Vus na pajais nagina franschisa, nagina resalva persunala e nagina contribuziun als custs da Vossa ospitalisaziun. Ma adatg: Sch'i dat cumplicaziuns entaifer las emprimas dudesch emnas da la gravidanza, stuais Vus As participar als custs sco tar ina malsogna.
Prestaziuns per la mamma
La cassa da malsauns paja la naschientscha, la controlla posteriura, eventuals custs en cas da cumplicaziuns, la cussegliaziun da tezzar ed ina part dal curs da preparaziun per la naschientscha (en cas ch’ina spendrera maina il curs). La naschientscha po avair lieu en in ospital, en ina chasa da parturir u a chasa. Sche l'ospital tschernì u la chasa da parturir tschernida na figurescha betg sin la glista d’ospitals da Voss chantun, duessas Vus dumandar ordavant la cassa da malsauns, sch’ella paja ils custs.
Prestaziuns durant consultaziuns da controlla
La cassa da malsauns paja las suandantas consultaziuns da controlla:
duas consultaziuns ad ultrasun (tar ina gravidanza da ristga er ulteriuras consultaziuns ad ultrasun),
il test da l’emprim trimester per sclerir la ristga da las trisomias 21, 18 e 13,
e, sch’il test da l’emprim trimester inditgescha ina gronda ristga, il test prenatal betg invasiv (NIFT) e – sche necessari – ina consultaziun da l’aua da la vaschia (amniocentesa) ed ina consultaziun da la placenta (biopsia coriala).
Latiers vegnan las controllas regularas tar Vossa ginecologa u Voss ginecolog. Sut circumstanzas po er ina spendrera far questas controllas.
Contribuziuns per l’uffantin
La cassa da malsauns da la mamma paja tut ils custs da la dimora en l’ospital dal poppin. Sche la novnaschida u il novnaschì è malsauna u malsaun e dovra in tractament en l’ospital, vegn quel pajà da la cassa da malsauns da l’uffant. En quest cas stuais Vus As participar als custs (resalva persunala).
En cas che Vus vegnis malsauna u malsaun a l'exteriur, paja la cassa da malsauns il tractament d’urgenza. L’autezza da la garanzia dependa dal pajais, en il qual Vus essas.
Assicuranza da malsauns en la UE
En la UE sco er en la Norvegia, en l’Islanda ed en il Liechtenstein dastgais Vus pretender ina indemnisaziun per las medemas prestaziuns sco la glieud indigena.
Impurtant: Vossa carta da la cassa da malsauns è a medem temp in’assicuranza da malsauns europeica. Prendai perquai adina ella cun Vus en vacanzas. Vossa cassa da malsauns po emetter per Vus in attest substitutiv, sche Vus avais emblidà Vossa carta da la cassa da malsauns.
Assicuranza da malsauns internaziunala
Ordaifer ils pajais da la UE e da la AECL paja Vossa cassa da malsauns Voss tractament d’urgenza mo fin ina tscherta summa. Surtut en cas d'ospitalisaziuns poi esser che Vus stuais pajar sezza u sez ina part. Sche Vus giavischais ina garanzia pli auta tras l’assicuranza, pudais Vus far in’assicuranza supplementara correspundenta. Quai po per exempel esser raschunaivel avant in viadi en ils Stadis Unids u en il Canada. En tuts dus pajais custan ils tractaments bler.
Prestaziuns che Vus stuais pajar sezza u sez
I dat prestaziuns medicinalas a l'exteriur che Vossa cassa da malsauns na paja betg. Quai è il cas tar in tractament nunnecessari u sche Vus cumprais medicaments a l'exteriur. I po er capitar che Vossa media svizra u Voss medi svizzer As trametta a l'exteriur per in tractament. Vus duessas discutar ordavant cun Vossa cassa da malsauns, sch’ella paja quest tractament. Savens paja la cassa da malsauns, en cas ch’in tractament en Svizra n’è betg pussaivel.
Sche Vus avais in conflict cun Vossa cassa da malsauns, pudais Vus As drizzar al Servetsch da mediaziun da l’assicuranza da malsauns. Il servetsch da mediaziun emprova da cuntanscher ina cunvegnientscha tranter Vus e la cassa da malsauns – gratuitamain, en moda neutrala ed independenta. Adatg: Vus na pudais betg As drizzar al servetsch da mediaziun, sch’ina advocata u in advocat ubain in servetsch social represchenta Voss interess u sche Vus avais in’assicuranza da protecziun giuridica.