Las autoritads svizras online

directamain tar il cuntegn

Empustar martganzia a l'exteriur

Mintga spediziun da l'exteriur è da princip suttamessa cumplainamain al dazi ed a la taglia sin la plivalur. La persuna ch'è obligada da far quai sto annunziar la spediziun a l'administraziun da duana per laschar far la taxaziun. En il traffic da posta e da currier na stuais Vus betg far sez quai: questa incumbensa vegn liquidada dal furnitur da servetsch (p.ex. Posta, DHL, UPS, e.u.v.).

Imports da dazi e da taglia sin la plivalur na vegnan betg incassads, sch'els na surpassan betg 5 francs per annunzia. Per spediziuns fin ad ina valur da 65 francs (tar ina TPV dad 7,7 %) inclusiv ils custs da transport, da dazi, d'assicuranza e.u.v. u da 200 francs (tar ina TPV dad 2,5 %) na ston ins pia pajar naginas taglias.

Ils custs da dazi che vegnan calculads da la Posta dependan dal pajais d’export e da la taxa da taglia sin la plivalur. Per spediziuns da la Germania, da la Frantscha, da l’Austria e da l’Italia importa la taxa da basa 11.50 francs, per spediziuns da tut ils auters pajais 16 francs. Tar quest import vegnan anc vitiers 3 % da la valur dal material suttamess a la taglia (senza taxa d’import e controlla da la duana).

Far cumpras online, spediziuns per express e per posta

Ulteriuras infurmaziuns chattais Vus sin la pagina d'internet da l'Administraziun federala da duana.

Dumondas frequentas en connex cun spediziuns postalas da l'exteriur, cun la duana e cun la TPV

Nua è mes pachet?

N'è Vossa empustaziun betg arrivada? Infurmaziuns davart il progress da la spediziun da Voss pachet survegnis Vus tar servetsch da clients International Post CH AG cun il numer da telefon 0800 888 100.