Las autoritads svizras online

directamain tar il cuntegn

Furmaziun supplementara per creschids

Vus vulais tegnair pass professiunalmain cun il svilup. Per quest motiv duessas Vus As perfecziunar cuntinuadamain. Novas cumpetenzas e certificats / diploms augmentan Vossas schanzas sin il martgà da lavur.

Furmaziun supplementara

La Svizra dispona d’in vast sistem da furmaziun supplementara. Las purschidras resp. ils purschiders da furmaziuns supplementaras èn numerus e lur offerta è multifara. I existan furmaziuns supplementaras ch’èn liadas ad ina tscherta professiun e talas che mainan ad in diplom.

Posts da cussegliaziun per la furmaziun da persunas creschidas

Ils posts da cussegliaziun da professiun, da studi e da carriera infurmeschan davart la purschida da furmaziun, las cundiziuns e las exigenzas. Plinavant mettan els a disposiziun documentaziuns davart differentas professiuns e dattan scleriment davart las pussaivladads pertutgant il sustegn finanzial.

Prender suenter il diplom professiunal

Sco persuna creschida pudais Vus prender suenter l’examen final d’emprendissadi ed obtegnair in attest federal da qualificaziun (AFQ) ubain in attest federal professiunal (AFP). L’Uffizi chantunal per la furmaziun professiunala decida davart las dumondas d’admissiun e dat las infurmaziuns necessarias.

Prender suenter la maturitad

Tgi che vul studegiar ad ina scola auta, po er prender suenter sco persuna creschida la maturitad gimnasiala resp. la maturitad professiunala.

Eidgenössische Berufsmaturitätsprüfung (EBMP)

Acquisiziun e mantegniment da cumpetenzas fundamentalas

Cumpetenzas da basa – sco leger, scriver, quintar ubain utilisar las tecnologias d’infurmaziun e da communicaziun – èn ina premissa impurtanta per emprender a vita duranta e per participar a la vita sociala. Sin la pagina d’internet «Einfach besser!» chattais Vus purschidas adattadas.

Furmaziun professiunala superiura

Tgi che dispona d’in attest da qualificaziun (AFQ) ubain d’in examen professiunal equivalent, po acquistar ulteriuras cumpetenzas spezialas. I dat duas pussaivladads:

  • ils examens federals (examens professiunals ed examens professiunals superiurs)
  • ils diploms da scolas spezialisadas superiuras

Furmaziun supplementara a scolas autas

Las purschidas da furmaziun supplementara da las scolas autas permettan a persunas cun diplom universitar d’acquistar novas qualificaziuns, da sa spezialisar u da s’orientar da nov.