Las autoritads svizras online

directamain tar il cuntegn

Cassas da malsauns – conclusiun, custs e prestaziuns da l'assicuranza fundamentala

Vus As stuais assicurar

Suenter la naschientscha u suenter l'immigraziun en Svizra avais Vus temp 3 mais da far in'assicuranza obligatorica per la tgira da malsauns. Durant quest temp essas Vus gia assicurà. Entaifer las assicuranzas permessas pudais Vus tscherner libramain Vossa cassa da malsauns. En cas excepziunals na sto vegnir fatga nagina assicuranza.

Register da las assicuranzas da malsauns permessas

Vus stuais pajar las premias, la franschisa e la resalva persunala

Mintga persuna assicurada paja ina premia mensila a la cassa da malsauns. La premia variescha da cassa a cassa e da chantun a chantun. Per uffants e giuvenils èn las premias pli bassas. Persunas che han paucs meds finanzials han eventualmain il dretg da survegnir ina reducziun da las premias.

Vus stuais As participar vi dals custs

En cas d'ina malsogna va ultra da quai ina part dals custs da tractament sin donn e cust da la persuna assicurada. Questa participaziun als custs sa cumpona da la franschisa, da la resalva persunala e d'ina contribuziun als custs per ina dimora a l'ospital.

Franschisa

La franschisa è l'import che Vus pajais mintga onn sez per Voss custs da tractament (quai èn 300 francs per persunas creschidas; uffants fin 18 onns na pajan nagina franschisa). Pir cur che quest import è cuntanschì, cumenzan las prestaziuns da la cassa da malsauns.

Resalva persunala

10 pertschient dals custs da tractament restants pajais Vus sez (cur che la franschisa è cuntanschida). Questa uschenumnada resalva persunala importa dentant maximalmain per onn 700 francs per persunas creschidas e 350 francs per uffants. Sche Vus vulais spargnar premias, pudais Vus augmentar voluntarmain Vossa franschisa.

Contribuziun d'ospital

La contribuziun importa 15 francs per di a l'ospital. Uffants, giuvens creschids en scolaziun e dunnas che na surpiglian nagins custs per prestaziuns da maternitad, na pajan nagina contribuziun d'ospital.

Evitar surpraisas

Sch'in medi fa in tractament che na vegn betg cuvrì da l'assicuranza fundamentala, As sto el infurmar. En cas da dubi vali dentant la paina d'As infurmar er tar Vossa cassa da malsauns.

Sco che la participaziun als custs funcziuna en detagl

Prestaziuns en detagl

L'assicuranza obligatorica per la tgira da malsauns surpiglia da princip l'analisa ed il tractament d'ina malsogna e da sias consequenzas. L'Uffizi federal da sanadad publica infurmescha detagliadamain davart las prestaziuns da l'assicuranza obligatorica da malsauns.