Las autoritads svizras online

directamain tar il cuntegn

Preparaziun da mes pensiunament

Per che Vus survegnias Vossa renta da la AVS (1. pitga) e las prestaziuns da Vossa prevenziun professiunala (2. pitga e 3. pitga), stuais Vus prender intginas mesiras.

Annunziar il dretg da retrair ina renta da la AVS (1. pitga)

La renta da la AVS na vegn betg pajada automaticamain. Per survegnir la renta stuais Vus annunziar en scrit Voss dretg tar quella cassa da cumpensaziun che ha retschavì las contribuziuns sco ultima. 

Vus stuais annunziar Voss dretg tar la cassa da cumpensaziun almain 3 mais avant che la vegliadetgna ordinaria è vegnida cuntanschida, per che quella haja avunda temp da metter ensemen tut las informaziuns necessarias per la calculaziun da la renta.

Tar ina retratga anticipada da la renta u tar ina suspensiun

Sche Vus vulais retrair anticipadamain la renta, stuais Vus inoltrar Vossa annunzia tar la cassa da cumpensaziun fin il pli tard l'ultim di dal mais, en il qual Vus cumplenis l'onn da vegliadetgna che As dat il dretg d'ina renta anticipada: 63 onns resp. 64 onns per umens, 62 onns resp. 63 onns per dunnas. In'annunzia rectroactiva n'è betg pussaivla. In'annunzia rectroactiva n'è betg pussaivla.

Sche Vus vulais suspender la renta, stuais Vus annunziar Voss dretg fin il pli tard 1 onn suenter avair cuntanschì la vegliadetgna regulara da pensiun.

Formular 318.370 "Annunzia per ina renta da vegliadetgna":

Co chat e contactesch jau mia cassa da cumpensaziun?

Retratga da las prestaziuns da la prevenziun professiunala (LPP / 2. pitga)

Per regla vegnan pajadas las prestaziuns da la segunda pitga en furma d'ina renta. La persuna assicurada po dentant pretender ch'in quart da ses dabun da vegliadetgna vegnia pajà sco chapital. Las cassas da pensiun pon prevair en lur reglament ch'ina quota pli auta po vegnir retratga sco prestaziun da chapital u che l'entir dabun vegn pajà sco chapital empè d'ina renta. Las modalitads sa drizzan tenor il reglament da l'instituziun da prevenziun. Observai perquai ils termins ch'èn fixads en il reglament da Vossa cassa da pensiun per il dretg d'in pajament da chapital. 

Omaduas pussaivladads (renta u chapital) han lur avantatgs e lur dischavantatgs, tut tenor Vossa situaziun persunala e Voss basegns areguard la prevenziun. Per ulteriuras infurmaziuns As drizzai per plaschair a Vossa instituziun da prevenziun. En cas da basegn po Voss patrun As dar las indicaziuns necessarias.

Tar ina retratga anticipada da la renta u tar ina suspensiun

En la Lescha federala davart la prevenziun professiunala (LPP) n'è betg previsa ina vegliadetgna flexibla da renta. Ina retratga anticipada è dentant pussaivla, sch'il reglament da Vossa instituziun da prevenziun prevesa expressivamain quai. La vegliadetgna minimala è 58 onns. As drizzai en quest cas almain 1 onn avant che Vus cumplenis il 58avel onn da vegliadetgna a Vossa instituziun da prevenziun per organisar Voss pensiunament.

Sch'il reglament da Vossa prevenziun professiunala prevesa quai, pudais Vus suspender il pajament da Vossa renta er fin a la cumplenida dal 70avel onn da vegliadetgna.

Retratga dal dabun da la prevenziun privata (3. pitga)

Per regla pudais Vus retrair il dabun da la terza pitga sco prestaziun unica da chapital e quai il pli baud 5 onns avant avair cuntanschì la vegliadetgna regulara da pensiun ed il pli tard la fin dal mais, en il qual Vossa renta da la AVS cumenza. Sche Vus cumprovais dentant che Vus avais vinavant in'activitad da gudogn, pudais Vus suspender il pajament da la terza pitga per maximalmain 5 onns suenter che la vegliadetgna da pensiun ordinaria è vegnida cuntanschida.

As drizzai a l'instituziun, tar la quala Vus avais la prevenziun privata e dumandai l'autezza dal chapital ch'è vegnì spargnà e las modalitads da la retratga.